Ki shipai iada khappud Border Security Force (BSF) ha ka 29 tarik Naitung kila ioh ban kurup 19 tylli ki lieng dieng jong ki Bangladesh ha ka wah Jadukata hajan Ghumaghat. Ia kine ki lieng dieng la pyndonkam ban khlong bad khaii tuh iaki maw napoh u pud u sam ka Ri India. Ïa kine ki lieng kiba la ïoh kurup la shimti ban aiti biang sha ka ophis Customs kaba don ha Dangar, East Khasi Hills district. Ka kyrwoh naki shipai BSF ka kdew ba kane ka jingleh stet bad kaba janai jong ki BSF ka la pynthut ia ki kam be-ain bad ka la pynthikna ia ka jingshngain jong ka thain khappud.
“Kine ki jait jingtreikam ba kyrpang ki long ki dak jong ka mission mode ba ki shipai BSF ki la shim ha khappud. Hynrei bunsien ki riewsniew na Bangladesh ki ju pyrshang ban rung tuh sha u pud u sam ka Ri India lyngba ki jaka ba don harud wah ban tuh maw bad dewbilat” la ong ka kyrwoh. Haba iadei bad kane, ki shipai BSF ki la ujor da ka jingpyrshah sha ki BGB ka Ri Bangladesh.
Ban pynneh ïa ka shongsuk shongsaiñ ha shilynter u pud u sam ka Indo-Bangladesh, la pynlong ïa ka jingïalang ha ka kyrdan battalion commandant ha ka 29 tarik Naitung hapdeng ki shipai BSF bad ki BGB Bangladdesh ban ïakren halor ki mat kiba ïadei bad ka jingpynkhlaiñ ïa ka jingsynshar bad ka jingpeitngor ha khappud.
