Ki shipai iada khappud Border Security Force (BSF) haka 18 tarik mynta u bnai kila bat 2 tylli ki kali ba kit Soh Apple ba thmu shalan tuh sha Bangladesh. Ia kine ki kali la bat ha ki thain khappud ka East Khasi Hills. Ka kyrwoh naki BSF ka kdew ba ki shipai BSF 04 Bn BSF hadien bala ioh jingtip kila pynlong ka jingap lynti Pyrdwah East Khasi Hills.
La iathuh ba kila ioh bat kawei ka kali Alto Car bad ka Maruti Van ba kit 40 synduk ki Soh Apple. Haba pynlong ka jingtohkit, ki Dribar jong kine ki kali ki khlem lah ban pyni iaki kot ki sla ban pynshisha halor ki mar ba ki kit.
Iaki ba shah kem bad iaki mar ba ioh kurup la aiti noh sha ka ophi Customs Pynursla.
