Kurup ki BSF 33,000 kilo ka Shini ba thmu khaïï tuh sha Bangla

Ka BSF Meghalaya bad ki Pulit ka jylla hapoh jong ka 24 kynta kila ioh kurup palat 33,000 Kg ka shini kaba la thmu ban khaïï tuh sha Ri Bangladesh lyngba ki thaiñ khappud jong ka rilum Garo.

Ki BSF kila pyntip ba kila pynlong ia ka jingkhynra bad ki pulit ha ka shnong Rongra, South Garo Hills hadien ba kila ioh ia ki jingtip kiba paka bad kila ioh kurup palat 33,000 Kg ka shini kaba la buhrieh ha kaweika iing jah da ka jingthmu ban khaïï be-aiñ sha ri Bangladesh.

Kila iathuh ruh ba ha kawei pat ka jingkhynra, ka BSF kala pynieng ia ka Mobile Check Post ha Baghmara bad kila ioh bat ia kawei ka trok kaba la kit bun bah ka shini kaba thmu ban khaïï sha Bangladesh bad na ka liang u nongniah bad u nongbud kila phet krad noh. Ki BSF kila leit ban aiti noh ia katei ka shini kaba la kurup sha ki bor kiba dei khmih.