Ban ioh ia ka jingthrang jingangnud ki Blei ki syiem kumjuh ba ki khun ka Raij ka shnong kin ioh ia ka shongsuk shongsaiñ, ka miat ka bha, ka roi ka par ha ki liang baroh bad ban bha ruh u khaw u kba, ha ka 16/09/24 ka Raij Mynso, West Jaiñtia Hills District ka la pyndep ia ka jinglehniam Behdeiñkhlam Behkymphui.Kane dei ka rukom lehniam ba la juh leh shisien shisnem hapoh ka Raij Mynsoo kiba dang dang ngeit bad dang ksoh ha ka niam tynrai ne niamtre. Ia kane ka jinglehniam mynta u snem la pynlong ha ki lai sngi kaba long nadouh 11 tarik bad la pynkut hynnin ka 16 tarik.
Ha kane ka sngi pynkut shwa ban sdang ka jinglehniam la pynlong ka jingialang lyngkot ha kaba u MDC ka JHADC u Evening Teron ula long kum u Kongsan ryngkat ka jingdonlang u Dolloi ka Elaka Jowai, u Puramon Kynjing, ki nongkitkam niam ka Raij Mynso bad kiwei. Hadien ka jingialang la pyndep ia ka lehniam ha ïing Langdoh da u Langdoh, u Pator bad kiwei ha ryngkat ka suit ka shor katkum ka jinghikai u barim.
Hadien ka jinglehniam na ïing Langdoh ki khun ka Niamtre ryngkat ka jingrah ia ki Sakymphui ba la tah pynwandur na ki dieng ki la mih na ïing Langdoh bad ialam ruh ia u Masi Kñia haduh ban poi ha ka jaka lehniam ba la kñia da u masi. Ia ka jinglehniam knia da u masi la ju pynlong shisien saw snem katba ha ki lai snem ban wan pat dei u snem ban kñia da u sniang.
