Hadien ki elekshon sha ka iingdorbar thawain Lok Sabha kaba 18, ka dorbar ba nyngkong jong ka Lok Sabha bad ka dorbar kaba 264 jong ka Rajya Sabha ka la sdang naduh ka 24 bad 27 tarik Jylliew. La pynkut ia kane ka dorbar jong ka Lok Sabha hynnin ka sngi, ka 2 tarik Naitung, 2024 katba ka dorbar jong ka Rajya Sabha ka la kut mynta ka sngi, ka 3 tarik Naitung, 2024.
Ha ka jingai jingkren sha ki lad pathai khubor ha New Delhi mynta ka sngi, u Myntri Sorkar Pdeng ba dei khmih ia ka Tnat Parliamentary Affairs Kiren Rijiju u la ai jingtip shaphang ki kam ha kane ka dorbar jong ka Parliament. Ki arsngi ba nyngkong ha Lok Sabha kilong tang ka jingbam smai ki dkhot ba shah jied thymmai sha ka iing dorbar thawain Lok Sabha kaba 18. Ha ka dorbar ki don baroh 539 na ka 542 ngut ki dkhot ba la bam smai.
Ban pyniaid ryntih ia ka jingbam smai, ka President jong ka ri ka la thung ia u BhartruhariMehtab kum u Shongknor ba shipor hapoh ka Article 95(1) jong ka Riti Synshar bad u Suresh Kodikunnil, u Radha Mohan Singh, Faggan Singh Kulaste, T. R. Baalu bad u Sudip Bandyopadhyay, ki briew kiba ki dkhot ki lah ban ai ka jingbam smai hapoh ka Article 99 jong ka Riti Synshar.
Ha ka 26 tarik Jylliew, 2024 la pynlong ia ka jingjied ia u Shongknor, Lok Sabha bad u Om Birla, Dkhot jong ka Lok Sabha u la shah jied kum u Shongknor lyngba ka voice vote. Ha kajuh ka sngi, u Myntri Rangbah duh, Narendra Modi u la pynithuh ia ka kynhun jong ki Myntri jong u sha ka iing dorbar thawain Lok Sabha.
Ha ka 27 tarik Jylliew, 2024 ka President ka la ai jingkren ha baroh artylli ki iing dorbar thawain jong ka Parliament ki la ialumlang hapoh ka Article 87 jong ka RitiSynshar da kaba ai jingtip ia ki jingjop jong ka sorkar ha ki por ba ladep bad ai jingtip ruh shaphang ka jingpynkhreh ia ka roi ka par ban wan jong ka ri.
Ha ka 27 tarik Jylliew, 2024, u Myntri Rangbah duh u la pynithuh ia ka Kynhun Myntri jong u sha ka iing dorbar thawain Rajya Sabha.
Ka jingiakren halor ka Motion of Thanks ha ka jingai jingkren jong ka President ka la long ha ka 28 tarik Jylliew, 2024 ha baroh artylli ki iing dorbar thawain.
Ha iing dorbar thawain Lok Sabha, namar ka jingdon ki jingpynthut, la lah ban sdang ia ka jingiatainia halor ka phang tang ha ka 1 tarik Naitung, 2024. U Anurag Thakur, MP u la sdang ia ka jingiatainia katba ka Bansuri Swaraj, MP ka la ai jingkyrshan ia ka jingiamir jingmut ha Lok Sabha. Baroh ki la don 68 ngut ki dkhot kiba iashim bynta ha ka jingiatainia katba palat 50 ngut ki dkhot ki la ai ia ki jingkren jong ki ha iing dorbar thawain. La jubab ia ka jingiatainia da u Myntri Rangbah duh hadien ka jingiamir jingmut kaba palat 18 kynta ha ka 2 tarik Naitung, 2024. Ki la don 7 tylli ki jingiashong treikam kiba kot haduh 34 kynta ha Lok Sabha bad ka jingseisoh ki kam wat hapdeng ka jingthut ha ka sngi kaba nyngkong ka long 105%.
Ha Rajya Sabha, ia ka jingiakren halor ka Motion of Thanks ha ka jingai jingkren ka President la sdang da u Sudhanshu Trivedi, MP, kaba la ai jingkyrshan da ka KavitaPatidar, MP ha ka 28 tarik Jylliew, 2024. Baroh ki don 76 ngut ki dkhot kiba iashim bynta ha ka jingiatainia kaba palat 21 kynta kaba la jubab da u Myntri Rangbah duh, Narendra Modi ha ka 3 tarik Naitung, 2024. Ka jingseisoh jong ka iing dorbar thawain Rajya Sabha ka la long palat 100%.
