Hynnin ka miet 28 tarik Nailur 2024, ka kynhun jong ki hati khlaw ka bym lah ban tip haduh katno tylli ki don, ki la wan ban thombor biang ïa ki jingthung jingtep bad ïa ki ïing ki sem ha ka shnong 15 mile kaba hap hapoh Ranikor Civil Sub Division, South West Khasi Hills District. Ki tyllong khubor ki ïathuh ba ki mar rep bad ki jingthung jingtep kiba la shah pynjulor ha ki hati ki long ki diengkwai, sohtrun dieng kait bad kawei ka ïing bad donbok ha katei ka jingjia ym shym la don ba mynsaw. Katkum ka kyrwoh khubor na ki nongialam ka Ranikor Area Farmers Association, kata, u Bah Micheal Lyngdoh, President bad u Bah Kyrmen K.Ryja, Secratary ki la ïathuh ba naduh ki snem ba lah dep ka seng ka la leit ban ujor ha ki bor ba dei khmih jong ka tnat wildlife kumjuh ruh ha ophis DC Mawkyrwat ha kaba ïadei bad ka jingwan thombor ki Hati khlaw hynrei na ka liang ki bor ophis ki la ka shu kut tang ha jingkular bad ki khlem leh eiei.
Ki la ïathuh ruh ba na ka liang ka tnat wildlife ka la wan jngoh bunsien bad kila kular ruh ba yn ai jingiarap ia ki nongrep ha kaba na ka liang ka RAFA ka la ai ruh ïa ki kot ki sla jong ki nongrep hynrei kane ruh kam shem seisoh eiei ruh em. Shuh shuh ki la ïathuh ruh ba ha u snem bala dep ka RAFA kala pynlong ïa ki jing ialang paitbah bad la shim ruh ïa ka rai ban siat ïap noh ïa kine ki mrad hynrei tang shisngi ar sngi na ka liang ki bor ba dei khmih ki la kyrpad ban nym leh kumta bad ki la kular ban shim khia, hynrei kane ruh khlem poi shaei shaei. Ki la pynpaw ruh ba ka long kaei kaei kaba sngewsih ïa ki pait nongrep ba kat u Myntri Rangbah ka jylla u Conrad Sangma haba u local MLA jong ka Ranikor u la pynsngew ïa kane ka mat ha ïing Dorbar Thawaiñ , hynrei u ong pynban ban ïa sah lang bad briew bad mrad, kane ka jingkren jong u ka mut ba u khein ïa ki nongrep jong ka thaiñ Ranikor kum ki mrad.
Kumta ka RAFA mynta ka khot ïa u Myntri Rangbah badon burom ba sngewbha ban wan dalade bad wan sah lang bad kine ki hati khlaw khnang ba un sngewthuh katno ka jingeh, katne ka jing pynjot jong ki hati khlaw ïa ki ïing ki sem ki mar rep mar riang, ki dieng ki siej bad pynher syrngiew ïa ki briew. Ka seng ka la byrngem ruh ba lada kan dang ïai jia ba kine ki hati ki dang wan pynjot, kim banse ban lum biang ïa ki paid nongrep ban shim biang da kiwei ki rai ba kham tyngeh.
