Ki ophis jong u Syiem Hima Jirang, Ri Bhoi District ba don ha Rani Jirang bad ha Iew Mawroh khappud ka Assam ki la kylla iingjot namar ka hima kam shym la pyntreikam shuh la bun bun snem bad wat ki Sign Board ruh kim don shuh mynta. Ha ka jingshisha ia kitei ki ophis ka hima ka dei ban pyntreikam namar ki long kum ki mawpud ban iada na ka jingklun jaka ka Assam, hynrei la shu iehnoh khlem don shuh ki nongpeit nongsumar bad ki kylla iingjah naduh ka jingkhlad noh u Syiem Tymmen u Pa’iem Lokendro Syiem ha u snem u 2005.Hadien ba la plie ia ka Rani Police Out Post bad ia ka Infiltration check post ha Iew Mawroh ki pulit ki la pynlong jaka sah ia katto katne ha kitei ki ophis jong ka hima wat lada ki la jot ne tlor.
Ka jingiakren ka la don na liang ki bor hima ban shna pynbha ia kitei ki ophis ha Rani bad Iew Mawroh hynrei ym lah ban tip kaei ka daw ba kim lah ban pynbha ia kitei ki ophis kiba long kum ki mawpud jong ka hima bad ka Assam. Kum ban pynpaw kitei ki ophis ha ka por synshar u Pa’iem Lokendro Syiem ki ju pyntreikam ban bishar ia ki kam hima sima ia ki paidbah ka thain bad ka la iarap shibun ia ki paidbah ha katei ka thain ban pyndep ia ki kam kum ha ka sngi Iew Rani bad Iew Mawroh bad ki paidbah ruh ki sngewsngain ban leit ban wan na ka jingdon kitei ki ophis khamtam ki para Khasi kiba leit donkam sha Assam na ki shnong ba jngai bad ki ju pynlong ruh kum ka jaka shongthait namar ba ki don ha khappud Assam.
Ha Rani Jirang donbok ka don ka Police Out post bad ka ophis jong ka state forest bad ka beat ophis ka KHADC katba ha Iew Mawroh ka don ka infiltration check post bad ka ophis forest ki dang mynta. Ki bor hima ki la dei ban shna pynbha noh khlam kloi ia kitei ki ophis na bynta ka jingbha ka miat ki paidbah bad khamtam ban iada na ka jingkyntur pud ka Assam.
