Watla ka thain New Shillong Township (NST) kaba don sha ka thain Umsawli, Mawdiangdiang ka dang dei tang ka jaka ba don ki jaka pule, ki jaka sumar, ki ophis Sorkar bad kiwei kiwei hynrei, kane ka jaka mynta ka kynti kala kylla ka jaka wan bret jaboh. Kadei shisha ba kane ka jaka ka long kaba itynnad namar ka jingdon ki khlaw ki btap, ki lum bad kane ka khring bha iaki paidbah ban wankai pynngad, wan bam khana. Hynrei lada poi sha kane la jaka la i sait met ban iohi iaki jait ba pki jait ki jaboh kiba la syrtap ha ki khlaw, ha rud surok bad haki nala. Lah ban ong ba ka daw ba pynlong ia kane ka jaka ban jaboh kadei hi namar ka jingle bym suidniew ki briew kiba wan kai lane wan bam khana ha kane ka jaka. Haba leit sha kane ka jaka, la iohi ba naduh ka surok mar pyrshah iaka iingdorbar thaw ain thymmai kaba don ha Mawdiangdiang ter ter haba iaid lyngba ka National Institute of Fashion Technology (NIFT), Shillong Technology Park Umsawli, ki rud surok bad ki khlaw kila syrtap daki jait pa ki jait ki jaboh.
Watla ki Jingpyntip (Signboard) bala pynmih daka New Shillong Township Dev Agency (NSTDA) ki don ha bun jaka kiba la kdew shai ba ym shah ban pynjaboh ne bret pathar iaki jaboh ne ban ia dih kyiad ha kane ka jaka hynrei, kumba iohi mynta kane ka hokum kam treikam satia. La sakhi ba kane ka jaka ka dap beit daki briew, kiba wan kai, wan bam khana hynrei ka jingkylli ka mih mynta, balei kim lum iaki jaboh ban bret sha ki jaka badei ban bret. Haba pyrshang ban iakren bad ki briew ba shongdukan shaneng ka Step Down Hospital bad marjan bad ka jaka jong ka Reserve Bank of India (RBI), kila kam ba kim don bor ba bthah iaki paidbah ba wan bam khana ban lum iaki jaboh namar kidei tang kiba shu wan shong dukan mynstep bad leit phai shala ing da lah dum.
Ki longkmie ba shong dukan ki iathuh ba kane ka jaka kam ju kynjah namar wat haka por mynmiet ruh ki don beit kiba wan shongkai, haki kali, ki arshaka wat harud surok. Marpyrshah ka jaka jong RBI, u don uwei u lum uba itynnad ba don ki phlang ba jyrngam bad ki dieng kseh barit hynrei kaba i sait met ban iohi ba, bun bynta jong une u lum u la shah tap daki jaboh naduh ki plastic, ki bilor kyiad bad kiwei kiwei ki jaboh.
