Ka jaka shangkai ba la ai nam ha kyrteng u Pa Tangon Nengminja Sangma u nongialehkai laitluid ka Ri India ha shnong Chisobibra hapoh ka Samanda C&RD Block, East Garo Hills, ka la kylla khlaw bad bun ki jingtei ki la jot la pra. Ha kane ka jaka shangkai ba la tei ia mot Pa Tagon bad pynieng ia ka lama India hynrei ki dok ki shin ki pynpaw ba la ieh shrah ia katei jaka la bun snem namar la sop tang ki niut ki nier ha ki jaka shongkai ki lynti iaid bad bun ki jingtei kynthup ki lynti iaid kjat ba siang dewbilat bad ki kynroh ki la pait la pra bad wat u mot ruh don ki bynta ba la pait bad ki maw sleit kiba hap sha madan.Kane ka long ka jingpynjah burom ka sorkar jylla ban ai khusnam Pa Tagon N Sangma ha ka ‘Meghalaya Day’ man u snem ban ai nam ia utei u riew khraw ka jylla bad ka Ri, katba ka jaka tei mot sahnam ka long khlaw bad sop niut, ka pynpaw ba ki bor sorkar kim burom ia utei u nongialam na Garo uba la iakhun pyrshah ia ki bor synshar phareng ha ki snem 1872 ban ioh ia ka jinglaitluid.
Ia ka Pa Tangon N Sangma Memorial Park la plie da u Purno A Sangma ha u snem 2008, bad la shna bun ki jaka shongkai, ka iing shong jahthait bad kawei ka iing hajrong bad pun da ka jingkieng. Ka jingtei pynitynnad ia ka Park ka la kot da ki klur nalor ki surok, ki lynti iaid kjat, jingker kynroh hynrei ki shu sep ei namar ba ym don ki nongpeit ne pynkhuid. Ki bor sorkar ki dei ban shimkhia ban pynkhuid ia katei ka jaka ban khring ia ki nongwan shangkai na ka jylla bad na shabar jylla bad khamtam kum ka dak ka jingburom ia u Pa Tangon u riew shlur ba la iakhun ban ioh ia ka jinglaitluid na ki phareng mynshwa.
Kum ban pynpaw u Pa Togan Sangma u dei u nongialam ka jaitbynriew na ri lum Garo ban iada ha ki senm 1872 na ka jingsynshar ki phareng ban klun ia ki lum jong ki jaitbynriew Garo. Hadien ka thma Anglo-Burma ba nyngkong (1824-1826) ka sorkar phareng ka la rai ban knieh ia ka them Brahmaputra da ka jingthmu ban pyniasoh bad them Surma lyngba ka lynti na Hima Nongkhlaw ha Khasi bad kane kan ktah ia ka imlang sahlang jong ki briew ha lum Garo. Katba u Pa Togan pat u dang bud dien ia ka jingjia ha katei ka thain baroh shilynter kumno ban iada ia ki shnong Garo. Ka jingiakhih ka la nangjur naduh u snem 1866 bad ka sorkar Bilat ka la rai ban kurup ia ki lum baroh ha Garo ha u snem 1872.
