Nongpoh, Risaw : Ar ngut ki nongñiah ia ka trok kit mar ki la lait thaw na ki jingjia ba sngewsih ne jingmynsaw hadien ba kawei ka trok kaba kit ia u dewiong kaba dang kiew na ki bynta ka Assam sha Meghalaya ka la jynrat ia ki jingker ka surok bah National Highway 06 bad ban kylla khongpong pat sha ka pynthor kaba don harud u tei u surok ha ka shnong Iewmawlong, hajan Nongpoh.
Katkum ka khubor ba la iohlum, la ong, ba kane ka jingjia kylla khongpong jong kawei ka trok kaba don ia u number ML 11 A 1368 ba la niah da u Mekershwa Rymbai, kaba la kit ia u dewiong ban leit kit sha ka kompani jong ka Star Cement Pvt Ltd sha Jaintia Hills District hamar ba poi ha katei ka jaka jong ka Lad Iewmawlong um shem la lah ban tehlakam shuh ia la ka kali bad leit rad beit ia ka jingker nar jong ka NH-06 bad rad ruh ia kawei ka trok kaba ieng ML 11 A 1380 ba la ñiah da u Silas Basumatari hashwa ban kylla khongpong sha ka pynthor kaba don harud u tei u surok bah.
La ioh jingtip ruh, ba ha kane ka jingjia, ki nongñiah jong kitei ki ar tylli ki trok kit mar kim shem la mynsaw satia bad na ka liang ki bor pulit ka Nongpoh Police Traffic Branch ki la ialam ban phah khmieh bniah ia baroh arngut ki nongñiah jong kitei ki trok.
