Kylli ka Congress ia u Bah Sanbor, katno sien u wan bad u kren hapoh ïing Dorbar

Katno sien u Bah Sanbor Shullai u wan sha ïing dorbar bad katno sien u kren hapoh ïingdorbar. Lada u shu wan khlem da kren eiei ka bha eh ba un shu shong hapoh ïing. Ia kane la ong da u Nongialam ka Congress u Bah Ronnie V Lyngdoh haba ia dei bad ka jingkynnoh u MLA ka BJP na South Shillong u Bah Sanbor Shullai uba la kynnoh ba u MP ka Shillong u Bah Vincent Pala u shu shong bah soh ot hapoh Parliament. Haba kren sha ki lad pathai khubor u Bah Ronnie u la ong, “U Bah Pala u la leh shibun ki kam. Shibun ki project ka Meghalaya ka la ioh namar ka jingshim khia u Bah Pala. U dei u briew u bym ju kwah ban paw pyrthei kum kiwei ki nongialam sain hima (Politician)”.

U Bah Ronnie u la ong ba ka jingkynnoh u Bah Sanbor pyrshah ia u Bah Pala kam don nongrim bad kane ka paw ba u Bah Sanbor um ju peit lane u ju buddien ia ki kam hapoh ka Parliament. U la ong ba u Bah Pala u la shim bynta ha bun ki jingiatai hapoh ka Parliament khamtam ban iatai ia ki mat ba donkam na ka bynta ka bha ka miat ki paidbah nongshong shnong bad ka Jylla Meghalaya baroh kawei.

Haba ia dei bad ka jingbym pynlong ia ki jingialang ka DISHA, u Nongialam ka Congress u Bah Ronnie V Lyngdoh u la ong, “Ha ki 2-3 snem ba la dep bad namar ka jingwan lyngshop ka khlam COVID, ka Sorkar Pdeng ka khlem pyllait ia ki skhim”.“Namar kane, kam don jingmut ban lum ia ki jingialang. Kum ban ai nuksa, ka Sorkar Pdeng ka la khate ia ka song pisa na ka bynta ka skhim National Rural Employment Guarantee Act (NREGA) bad kiwei ki skhim” ula ong.