Kyllon ïap uwei na ka jingpynbthei bom ïa ka ophis AMSU, pynrem ka NESO

Ka North East Students’ Organisation (NESO) kala pynrem jur ia ka jingthombor da kaba pynbthei bomb ia ka ophis treikam jongka All Manipur Students’ Union (AMSU) kaba don ha DM University Campus, Thangmeiband, Imphal, ha kabauwei u samla pule u la kyllon iap, katba uwei pat ula mynsaw jur ha katei ka jingjia. Katkum ka kyrwoh na u Chairman ka NESO u Bah Samuel Jyrwa bad u Genral Secretary u Mutsikhoyo Yhobu kila pynpaw ba ka NESO ka pynrem jur ia katei ka kam thombor da kaba pynbthei ia u bomb kaba la shim iaka jingim jong uwei u samla pule ka DM College u Oinam Kenejy bad uwei pat u samla pule u Salam Michael uba la mynsaw jur. Ka NESO kaba kynthup ia ki 8 tylli ki sengbhalang ka thain shatei lam mihngi ka dap da ka jingsngewkhia ia ktei ka jingjia kaba la jia ha ka 23 tarik u Rymphang haka por 9:30 mynmiet ha ka All Manipur Students’ Union (AMSU) kaba don ha DM University Campus, Thangmeiband. Ka NESO ka pynpaw ia ka jingsngewkhia kaba jur halor ki jingjia jong kiba bun tylli ki jingjia ha kaba ka ophis treikam jong ka sengbhalang UCM kala shah wiang ding, ka Macha Leima School bad ka jingpynjot bad jingpynjulor ia ki ophis treikam jong ki sengbhalang bapher bapher bad ka jingjulor iaka iingsah jongu Sinam Prakash uba long u Nongaibut jongka NESO.

Ki nongialam ka NESO kila pynpaw, ba kum ka kynhun ki samla pule ka AMSU kala iengskhem ha ka nongrim ka bym iadonbynta ha ki kam saiñ pyrthei bad kam shymlaiaid haka lynti jong ka jingiaumsnam bad ha kum kane ka khyllipmat, ka long kaba kongsan ba ki paidbah kin btin lynti bad ban pynthikna ba ka AMSU kan bteng ban long kum ka kynhun kaba bym donbynta ha ka kam saiñ pyrthei kaba iengskhem ha kaban pynlong ia ki jingiakhih ki bym iaid da ka lynti jongka jingiaumsnam. “Kine ki jingjia kila pynklumar khlieh bad pynsyier ia ka jingmut jingpyrkhat jong ki samla pule bad ia ki paidbah baroh bad ka NESO ka kyntu ban long kiba jai jai khnang ba ka shongsuk shongsaiñ kan wanphai biang bad ha kajuh ka por, ka kyntu jur ia ka sorkar jylla ba kan shimkhia mardor shisha ia kane ka jingjia ban pynneh pynsah iaka shongsuk shongshngain bad ban pynshitom ia kiba donkti ha ka kam sniew” ong ki nongialam ka NESO.

Kila ong, ba ka sorkar kadei ban bteng ha kaban iaid shakhmat bad ka jingiakren iasuk bad ha ka juh ka por ban shim ia ki sienjam ban don ka jingiakren bad baroh ki kynhun kieng atiar ban poi sha ka jingiasngewthuh jingmut kaban pdiang da baroh lang na ka bynta ban iada bad ban kyntiew ia ki riewlum tynrai ka Manipur kaban pynmih ia ka jingsuk kaban nehshi rta. Ka NESO kala pynkynmaw ruh ba ha u snem bala dep, kala sdang ia ka Peace Mission ha ka por ba ka don ka jingiakynad kaba jur hapoh ka jylla Manipur bad kumta kan iai bteng ha kaban bteng ia kane ka Peace Mission bad ka NESO ka ngeit skhem ba baroh kiba don bynta kin ai jingkyrshan ia kane ka jingthmu ban wanrah iaka jingsuk ha ka jylla Manipur. Ka NESO kadei ka synjuk jong ki sengbhalang ka thaiñ shatei lam mihngi kaba kynthup ia ka Khasi Students’ Union (KSU), All Assam Students’ Union (AASU), Naga Students’ Federation (NSF), Mizo Zirlai Pawl (MZP), Twipra Students’ Federation (TSF), All Manipur Students’ Union (AMSU), Garo Students’ Union (GSU) bad ka All Arunachal Pradesh Students’ Union (AAPSU).