U kyrtong ka Voice of the People Party (VPP) u Dr Ricky AJ Syngkon ula thaw histori da ka jingpynliem ia u MP ka Congress u Bah Vincent H Pala uba la bat haduh 3 samoi kum u MP ka Shillong da 371910 vote.U Dr Ricky jong ka VPP ula ioh haduh 5071078 vote, katba u Bah Pala naka Congress ula ioh 199168 votes. Kiwei ki kyrtong kynthup ka MLA ka Kong Dr Ampareen Lyngdoh na National People’s Party (NPP) ka 186488 vote, u Bah Roberjune Kharjahrin naka United Democratic Party (UDP) u ioh 44563 vote, ki kyrtong shimet kata u Prof Lakhon Kma u ioh 18582 vote bad u Bah Peter Challam u ioh 7024 vote. Ka vote NOTA ka long 11008 vote bad kiba vote ba shah kyntait ki long 646 vote.
Ha Tura parliamentary seat, u kyrtong ka Congress u Saleng A Sangma ula pynkut ia ka jinglong nongmihkhmat ba 47 snem na ka longiing u (L) Purno A Sangma, da ka ba pynliem ia ka khun bad ka MP jong ka National People’s Party (NPP) ka Agatha K Sangma.U Saleng ula ioh haduh 383919 vote katba ka Agatha kala ioh tang 228678 vote, kaba pynlong ia u Saleng ban jop da 155241 vote.Lah ban kdew baka South Tura kaba kadei kaba mihkhmat bad kadei hi ka ktem jong u Myntri Rangbah ka Jylla u Conrad K Sangma hynrei ha kane ka kynti, ki nongthep Vote kila jied hi ia u Saleng naka Congress. Watla ka Congress ka don tang uwei u MLA ha ka thain Ri-lum Garo Hills kata u Saleng A Sangma uba mihkhmat nak Gambegre constituency katba ka NPP ka don 18 ngut bad uwei u MLA shimet hynrei kim shym la lah ban tem ia ka lyer kaba beh sha ka Congress.
Haduh 1642761 ngut ki nongthep vote kila iathep vote ha kine ki artylli ki constituency ka Jylla kaba la long ha ka 19 tarik Iaiong, 2024.Ha Shillong Lok Sabha seat, ki don haduh 1,400,411 ki nongthep vote jong ka ilekshon Lok Sabha 2024.Lah ban ong ba kane ka jingshah rem ka NPP na Shillong Parliamentary constituency kadei namar ka jingdon ka mynsiem ka jingbym sngewtynnad shuh ki paidbah nongthep vote ia ka Sorkar synroplang ka Meghalaya Democratic Alliance (MDA).Katba ha Tura-2, ka National People’s Party (NPP) kala mad ia ka jingjakhom namar ka jingiatehlok bad ka Bharatiya Janata Party (BJP).Ka slogan “Kawei ka Vote ia ka Agatha ka dei kawei ka Vote ia u Modi” kala shim ia ka bynta kaba khraw bha ban khrung ia ki nongthep vote ba kin ai ia ki vote jong ki sha u Saleng A Sangma jong ka Indian National Congress (INC).
