Chief executive Member (CEM) ka Khasi Hills Autonomous District Council (KHADC) ha ryngkat ki Executive Member (EM) hynne ka sngi ki la leit ban iakynduh ia u Lat ka Jylla u CH Vijayashankar ban kyntu ban ai jingmynjur noh ia ki 7 tylli ki Bill ki ba la dep ban pdiang da ka ingdorbar jong ka KHADC.
Haba iakren bad ki lad pathai khubor hadien ka jingiakynduh ia u Lat ka Raj Bhavan, u CEM ka KHADC u Bah Pyniaid Sing Syiem u la ong, “Napdeng ki 7 tylli ki Bill, 2 tylli ki dei ki Bill kiba donkam bha ban ioh ka jingmynjur noh ki kynthup ia ka KHAD (Administration of Elaka) Amendment Bill, 2023 kaban aibor bad jingithuh ia ka jingtreikam ki seng Samla bad Seng Longkmie ha ki Shnong bad kawei pat ka dei ka KHAD (Khasi Social Custom of Lineage) Amendment Bill 2023 ban register bad pynbeit ia ka rukom pyniaid ia ki seng Kur (Clan administration) hapoh ka thain”.
U Bah Pyniaid u la iathuh ba kat kum ka jingwad bniah, ki don palat 3000 tylli ki seng kur ha Ri-lum Khasi hynrei haduh mynta ym pat shym la ithuh satia ia ki da ka ain. U la iathuh ba KHAD (Khasi Social Custom of Lineage) Amendment Bill 2023 kadei Bill, kaba kdew ba dei ban don ia uwei u Nongialam Kur ban ithuh da ka KHADC.
“Haka jingiakynduh ia u Lat, u la kular ha ngi ba ban un sa ai noh mar mar ia ki jingmynjur khamtam ia kine ki 2 tylli ki Bills ba kongsan” u la ong. Kiwei pat ki Bill baka KHADC kala leit kyntu ia u Lat ban ai jingmynjur noh ki kynthup ka KHAD (Regulation and Administration of Land) Amendment Bill, 2024, KHAD (Fisheries Amendment) Bill, 2023, Regulation of Trading by Non-Tribal Amendment Rules, 2023 bad ka KHAD (Autonomous Districts Nomination and Election of Lyngdoh and Myntri, Lyngdoh Raid and Sordar Shnong Administration of Sohiong Lyngdohship) 2023.
