U Myntri Rangbah ka Jylla u Conrad K Sangma hynne ka sngi ula leit ban kynduh ia ki samla pule NEHU kiba dang don hapdeng ka jingshah thngan khlem pud sngi. Lah ban kdew ba ka jingshah thngan ki samla pule NEHU ka la jam sha ka 11 sngi. Ha ka jingleit jngoh ia ki samla pule ha NEHU, u Conrad la bthah ia ki lad pathai khubor ba kim dei ban ring dur katba u dang ïakren bad ki nongïalam jong ka NEHUSU bad ki samla pule kiba shah thngan.
Haba kylli u Conrad u la kyntait ban jubab bad u la ong, “Ka la don ka jingiakren hynrei ngam lah ban iathuh mynta. Ngin sa iakren Pat”. Na ka liang u General Secretary ka NEHUSU u samla Toniho Kharsati ula ong, “U Myntri Rangbah u la pynpaw ba um shym la wan kum u Myntri Rangbah ka Jylla hynrei ula wan kum u riew paidbah. Ngim lah pat ban klet ba u Conrad Sangma u dei u Myntri Rangbah jong ka jylla baroh kawei.”
U samla Toniho u la iathuh ba u Conrad u la kyrpad ïa ki samla ban pynkut noh ïa ka jingïakhih shah thngan bad ban pyrkhat ïa ka koit ka khiah. “Hynrei ngi la pynsngew ha u, kumba ngi la sdang ïa kane ka jingshah thngan ka long halor ka jingdawa ban weng ïa u Vice Chancellor bad ngi la kyrpad ïa u Myntri Rangbah ba un pynsngew sha ki tyndong skhor ka Sorkar Pdeng ïa ki jingdawa jong ngi ki samla pule namar da lade ula ïohi da la ki jong ki khmat ïa ka jinglong jingman hangne hapoh skulbah” la ong u samla Toniho.
