Kum shibynta ban rakhe ia ka jinglaitluid ka ri India, ka Centre for Historical Research Synod College (CHRSC) ryngkat ka jingiatreilang bad ka History Club jong ka Synod College mynta ka sngi ka la pynlong ia ka jingrakhe ban kynmaw burom ia ka Phan Nonglait kawei na ki riewshlur kynthei. Ka Chairperson jong ka Women Commission ka kong Iamonlang Syiem ha kane ka sngi ka la pyrto ia ka jingshlur ka Phan Nonglait, ba kadei ban hiar pateng sha ki kynthei ka jaitbynriew.
Ka la ai mynsiem ia ki kynthei ba kidei ban mih shakhmat haba ki iakynduh ia kino kino ki jingeh lane lada ki shah thombor ruh kim dei ban shu sngap jar hynrei kidei ban iamir jingmut ban kiwei khnang ban nym don ka jingsngew long marwei. Katba na ka liang jong ka Prof AN passah ha kane ka sngi ka la batai halor kane ka jingim jong ka Phan Nonglait kaba dei kawei na ki kynthei ka riewkhraw ka jylla kaba shlur ban iakhun pyrshah wat ia ki Dohlieh.
Ka la ban jur halor ka jingiaid lynti jong kane ka riewkhraw na Khasi Jaintia kaba la kloi ban len lade na bynta ban iakhun pyrshah ban iada ia ka ri bad ka jaidbynriew. Ka Prof Passah ka la ai mynsiem ia ki kynthei ba kidei ban long kiba shlur ban bud ia ki sienjam jong ka Phan Nongalait. “Lada ka Phan Nonglait ka lah ban len ia ka jingim na bynta ki paidbah, phi ruh phin lah ban noh synniang ha ka imlang sahlang ,” ka la ong.
