Kum shibynta jong ka jingkynmaw burom ia ka lyngkhuh sngi iap jong u Dr. A.P.J. Abdul Kalam ha ka sngi saitjain, ka IIM Shillong ka la pynlong ia ka Dr. APJ Abdul Kalam Memorial Lecture ba 8, ha kaba la iakren shaphang ia ki jinghikai bad ki jingsynniang ki jong u Dr Kalam. La sdang ia kane ka jingïalang da kaba leh burom ia une u riewkhraw ka ri, da kaba buh syntiew khamtam haba u Dr Kalam u don ia ka jingiadei bad ka IIM Shillong.
U Dr. Sanjeev Ningombam, u khlieh jong ka Abdul Kalam Centre for Policy Research and Analysis of IIM Shillong ula kren shaphang ki jinghikai jong u Kalam, ha ka jingdonlang u Dr. SP Agarwal, Director jong ka North Eastern Space Applications Centre (NESAC), u riewstad ha ka Remote Sensing bad ka GIS applications na ka bynta ban pynïaid ïa ki marpoh khyndew, ka jingpynïaid ïa ka jingpeit bniah ïa ka jingktah jong ka jingkylla ka suiñbneng.
La sdang ia ka “Nurturing Minds”, ha u snem 2015 hadien ka jingkhlad noh jong u Dr. Kalam da ka jingthmu ban ai burom ia ka jingiohi jngai ka jongu “Education for All” ne ka pule puthi ia baroh bad ban tei iaka jingiadei kaba khlain bad ki nongshong shnong da kaba pynleit jingmut ha ki skul ha ka thain, ban shakri kum ki paralok ha kane ka jingpyrshang, ban ailad ia ki samla pule IIM Shillong ban wanrah ia ka jingkylla haka jingpule jong ki samla pule.
Ha katei ka jingialang, la iatai bniah ia ki bynta bapher bapher jong ka teknoloji ha ka suinbneng, kynthup ia ka jingshon dur da ki satellite, ka jingshngain ha ka imlang sahlang, ka jingroi jingpar kaba neh, bad ka jingpynduna ia ka jingma na ki jingjia ba sngewsih. Kila banjur ruh ia ka bynta jong ka teknoloji ha ka suinbneng ha ka rep ka riang, ka jingstad khyndew, ka jingtih mawshun, ka jingthmu ia ki jingtei, bad ka jingpule ia ka duriaw bad ka suinbneng.
