Ka skul O.M Roy Memorial Secondary School hynne ka sngi ka la kynmaw burom ia u nongseng ba radbah jong kane ka skul, u (Late) Bah T.L. Pariong da kaba ka la plie ia u motdur sah kynmaw ha phyllaw jong kane ka skul kaba don ha Mawlai Kyntonmassar. Ha kane ka sngi la iadonlang u MLA ka Mawlai Constituency u Bah Brightstarwell Marbaniang kum u kongsan, kumjuh u MDC Bah Teiborlang Pathaw, ka Principal Kong Astronomist Syiemlieh, Bah A. Rymbai, ki nonghikai, ki khynnah skul bad ki nongshah khot sngewbha. Kumba ka paw u (Late) Bah T.L. Pariong u la long u nongseng ba radbah ia ka skul OM Roy Memorial Secondary School kaba ha Mawlai Kyntonmassar naduh u snem 1992, nalor ka O.B Roy Memorial Lower & Upper Primary kaba u la seng ha u snem 1973 ha Rangthong, kaba ha South West Khasi Hills.
Ym tang ba u la long u nongseng, hynrei shibun ki la paw na kine ki ar tylli ki skul. Ka skul OM Roy ka la long ruh kaba paw ha ka kam ialehkai phutbol ha kaba ka la lah ban rah ia ka nam lahduh ha ka International Subroto Mukherjee Cup Football Tournament jong ka kyrdan ialehkai Under-17 ki shynrang ha u snem 2013.
Kat kum ka jingpynpaw da ka Principal kaba dei ka khun kynthei marwei jong utei u nongseng, la ong ba u (Late) Bah T.L. Pariong u long uba ju sngewtynnad bha ban ialehkai phutbol kum u rangialehkai ‘dien ne defender ha ki por ba u dangsamla ha kaba u la iashim bynta ha shibun ki lympung ialehkai phutbol khamtam ha ki thain jong ka South West Khasi Hills. Ha kane ka 9 tarik u Naitung 2024 kaba dei artad ka lyngkhuh sngi khlad kaba lai jong utei u rangbah (bam kwai ha dwar U Blei) ha kaba na ka liang ka Principal, ha ryngkat ki nonghikai bad ki khynnah skul ki la buh syntiew hakhmat utei u mot dur sah kynmaw.
