Hynne ka sngi ki nongialam ka Voice of the People Party hapoh ka jingialam u Damewanhi L Rymbai organising secretary VPP Centre Body ki la leit kyntu ia u CEM ka JHADC u Thombor Shiwat ba ki dei ban pyllait syndon ia ka tulop ba sahteng ki nongtrei hadien ba ki la ioh ka bhah pisa na ka sorkar Jylla ban siew tulop ia ki nongtrei dang kumba shibnai. Ha kane ka jingiakynduh na ka liang u CEM ula ong, ka daw bym lah ban siew shisien siew dei namar ba ka treasury kam pdiang kumta ki hap ban siew khyndiat shisien.
Kumta na ka liang ka VPP ka ong, ba kan buddien ia kane sha ka treasury khnang ba ki nongtrei kin ioh lut ia ka pisa bad ruh ki kyntu ia u CEM ba un ialeh shitom na ka bynta ka jingsiew ba shakhmat. U Damewanhi Rymbai haba kren sha ki lad pathai khubor ula kynthoh ia u MDC ka Sutnga Nongkhlieh u Richard Singh Lyngdoh halor ka jingkren tohmet jong u ia ki nongialam ka VPP katba ki dangiakren ai jingmut ia u CEM ha kaba ula kren ki kyntien khor da kaba ong, Phi dei kiei ? ba phi ia kwah ia kata ka jingiatreilang hapoh ka council.
Halor kane u Damewanhi Rymbai ula bynrap da kaba ong, ngi sngewthuh ba lada dei u paidbah ne kino kino ki kynhun seng ruh ka council ka donkam ka jingiatreilang, namar ba dei ka synshar paidbah ym ka jong shimet, hynrei sngawsih pat ban don kum kito ki nongmihkhmat namar ka jingiakren ka dei na ka bynta u paidbah ym ka jingmyntoi shimet ne jong ka party.
