U Nongialam ka Liangpyrshah u Dr Mukul Sangma hynne ka sngi ula kynnoh ba ka Sorkar Jylla ka pyrshang ban pyntroin ia ki District Council hapoh Meghalaya. Ia kane u Dr Mukul ula kynnoh halor ka jingshah set tulop ki Nongtrei ka GHADC mynta da ki bun bun bnai. Haba kren sha ki lad pathai khubor u Mukul ula ong, ka jingbym shimkhia ka Sorkar ban iakren sha ka Sorkar Pdeng na ka bynta ban iarap pisa ia ki District Council ka kdew shai ba ka Sorkar Jylla kam don ka jingkitkhlieh ban pynkhlain ne ban iarap ia ki District Council hapoh Meghalaya.
“Nga pynrem jur ia kane ka jingleh mynthi ka Sorkar Jylla ka bym don ka jingkitkhlieh ban iarap ia ki District Council bad ka dei ka Sorkar ka kwah ban pyntroin ia ki District Council hapoh ka Jylla kaba long kaba pyrshah ia ki paidbah” la ong u Dr Mukul. Ula bynrap ba ka dei ka kamram jong ka Sorkar Jylla ban iakren bad ka Sorkar Pdeng ban pynpoi ia ki jingiarap namar katkum ki kyndon ka Riti synshar ka Ri India, ki District Council kiba hap hapoh ka khyrnit ba hynriew ki don hok ban ioh jingiarap, la ka dei na ka Sorkar Pdeng ne na ki Sorkar Jylla.
“Ka Sorkar Pdeng ka iarap pisa ia ki Panchayati Raj hynrei ha Meghalaya ka Panchayati Raj kam don namar don ki District Council, namar kata ki District Council ki don ka hok ban ioh jingiarap bad kane ka shong ha ka jingstad jong ka Sorkar Jylla ban pynsngew sha ka Sorkar Pdeng” ula ong.
