Ka Iingbishar Meghalaya High Court ka la kyntait ban bishar ia ka mukotduma ba la mudui da u MLA ka VPP na North Shillong Bah Adelbert Nongrum, pyrshah ia u Lamphang ka Iing dorbar Thawaiñ ka Jylla bad ka iingkashari ka la pynpaw ba ym lah ban kheiñ ba ka jingleh jong u Lamphang ka long be-aiñ lane ka long pyrshah ia ka riti synshar ka Ri. U Bah Adelbert Nongrum ula mudui ia ka mukotduma pyrshah ia u Lamphang ka iing dorbar thawaiñ ka jylla, halor ka nongrim ba um shym la shah ia u ban wanrah ia ka mat iatai ba kyrpang (Special Motion) halor ka kaiphod Comptroller & Auditor General (CAG) halor ka Social and Economic Sectors jong u snem 31.03.2022 ka Jylla Meghalaya hapoh ka Dorbar Mang Tyngka 2024.
U Advocate General ka Jylla A Kumar ula ban jur halor ka Article 212 jong ka Riti Synshar ka Ri, ka ong ba kaei kaba la kynthoh ha ka writ petition ka dei ka rai jong u Lamphang, kaba ula leh ha kaba pyniaid ia ka Dorbar, ia kaba ym lah satia ban buh jingkylli da ka Iing kashari. Nalor kane ula pyntip, ba u Lamphang u khlem shah ban iatai ia kane ka mat ba la wanrah da une u dkhot ka Iing dorbar ka dei namar, ka kaiphod CAG ka dang don hapoh ka jingbishar jong ka Committee on Public Account (PAC), kaba la thung katkum ka Rule 241 jong ka Rules of Procedure and Conduct of Business bad kam don satia ka jingleh be-ain u Lamphang pyrshah ia ka riti synshar ka Ri.
U Nongmudui u la aiti ruh ia ka Notis, “Breach of Privilege katkum ka Rule 159 jong ka Rules of Conduct and Procedure ia kaba la pdiang da u Lamphang bad ia kane la buh ruh ha ka jingtynjuh (Vote) hynrei kane ka la shah rem noh, kumta ka rai ban ym shah ia ka Special Motion ka la long ka rai ba khatduh. Ka ïing kashari ka la pynpaw watla ka don ka jingkdew ia ka Article 194 (1) jong ka Riti Synshar ka Ri, ban pyrshang pynmynjur ia ka ïing kashari ba ka hok jong u nongmudui ka la shah pyrkhing ha u Lamphang, namar kata ka la pynlong ia ka rai kaba be-riti, ka dei ban shim ba ka Article 194 (1), watla ka ai ia ka hok ban kren laitluid hapoh ka ïing dorbar ha man ki Jylla, hynrei kane ka shong pat ha ka Riti Synshar bad ha ki Rule bad Standing Order kiba tehkyndon ia ka rukom pyniaid ia ka Iing dorbar Thaw Ain. Ka hukum ka iing bishar ka la ong, namar kine kiei kiei u Lamphang ula rai ban nym shah ia ka special motion, un ym lah ban kheiñ ka long be-ain ne pyrshah ia ka riti synshar ka Ri.
