Kyntait ka NPP halor ka T.1 klur tam ba shah kurup

Ka National People’s Party (NPP) kala pynpaw ia ka jingpyrshah kaba jur halor ka jing pyrshang ban pyniasnoh ia u National President bad Myntri Rangbah ka Meghalaya Conrad K Sangma lem bad ka Party halor ka jingioh kurup pisa ha Arunachal Pradesh. Lah ban kdew ba ki Pulit ka Arunachal Pradesh kila ioh kurup haduh T. 1.25 klur na kawei ka kali bym pat register, kaba bud nadien ki kali ba iaid kynhun (convoy) jong u Myntri Rangbah ka Jylla U Conrad K Sangma. Kum ban shu kdew ba u Conrad K Sangma u la leit sha Arunachal Pradesh ban ialap ilekshon ha Longding district Arunachal Pradesh na ka bynta u kyrtong ka NPP.

Haba pynshai ia kane ka jingjia, u Nongaiktien ka NPP u Bah Himalaya M Shangpliang u la ong ba ka kali kaba shah bat bad ba ioh kurup pisa, kam dei satia ka kali kaba leit lang bad u Myntri Rangbah ka Jylla Meghalaya. “Ngi ban jur ba ka kali ba ioh kurup pisa, kam dei satia kaba leit lang bad ka kynhun jong ngi, ia kaba la pynshisha ruh da u Superintendent of Police ka Longding” ong u Bah Himalaya. U Bah Himalaya ula ong ba ki kali ba iaid kynhun jong ngi kynthup ka kali ba kit ia u National President kila pyndep ia ka jingshah talasi kat kum ki kyndon bala buh jong ka ilekshon bad ym shym la lap eiei ha kane ka jingshah talasi.

“Ha ka jingtalasi kali ha Kanubari check gate da ka FST, SST bad Pulit, wat ka kali u Myntri Rangbah bad ka kynhun jong u, kynthup ki kali Pulit ba pahara, kila shah talasi bad ym shym la lap eiei satia na ki” ula bynrap. U Bah Himalaya ula ong “Ngim don jingtip eiei ia ka jingjia ba kynthup ia ka kali ba kurup pusa tad hadien bala mih ki khubor ha ki lad pathai khubor. Ka Party jong ngi kam tip eiei ia kane ka khubor bad kano kano ka jingpyrshang ban pyniasnoh ia kane ka jingjia bad u National President jong ngi, ka dei kaba khlem nongrim bad ka bym shongnia”.