Ka seng ki nongdie madan ha Khyndailad hapoh ka ka lama jong ka Meghalaya Greater Shillong Progressive Hawkers and Street Vendors Association (MGSPHSVA), ki la ong ba da lei lei ruh kin ym khih bad kin ym kynriah na kane ka jaka die madan ha Khyndailad. Ka seng ki nongdie madan ki la kren ia kane hadien ba u Myntri ka tnad ka kam jngohkai pyrthei ula ong ba yn pynkylluid ia ka Khyndailad khnang ba ki nongwan jngohkai pyrthei kin suk ha ka iaid ka ieng.
Haba kren sha ki lad pathai khubor, ka nongialam ka seng ki nongdie madan ka kong Biolinda Pyrtuh, ka la ong ba la 20 snem ka la shong die madan ha khyndailad bad lada ka sorkar ka thmu ban pynkynriah ia ki ha khrum MUDA Parking lot, da lei lei kin ym treh. Ka la ong ba ki nongdie madan lehse kin lah ban kynriah, tang lada ka sorkar kan shna da kawei ka Mall na bynta ki nongdie madan ha Them Iew Mawlong ne ha kino kino ki jaka ba long Iew.
“Nga kyrpad ia i bah Paul ba im dei than ban niew bein bad shu kwah ban pynkynriah ia ki nongdie madan na kane ka jaka. Ngi khlem pynthut iano iano ruh, hynrei i bah i ong ba in weng iangi bad ba in ai ha MUDA parking Lot. Ngin nym lah ban pdiang namar yn nym don iew nalor kata ngin hap ban siew sa ka bai wai,” ong ka kong Pyrtuh. Katkum ka jingong ka kong Pyrtuh ki nongdie madan tang ha Khyndailad ki don ym duna ia ka 600 ngut baroh. Ka la ong, “ Ngim kyrngah lada ka sorkar kan pynbiang ia ka jaka ban shna ia ki Mall ha ki jaka ba long Iew, hynrei kam dei ban shu shna kulmar kum ha NEIGHRIMS, ne Mawroh.”
