Kyntait thep Vote ki 5 shnong hapoh Assam kwah don beit ha Meghalaya

Ki nong shong shnong jong ka Tarabari Sector kila rai ban nym thep Vote hapoh ka Jylla Assam hynrei kila pynpaw ba ki kwah ban thep Vote ilekshon MP 2024 hapoh Meghalaya ka ban long haka 19 tarik Iaiong 2024. Lah ban kdew baka jingthep Vote ha Meghalaya kan long tang shisien kata haka 19 tarik Iaiong hynrei hapoh Assam ka jingthep Vote kan long haka 19 tarik, 27 tarik Iaiong bad 7 tarik Jymmang 2024.

Ia kane ka rai, ki nong shong shnong ka thain Tarabri Sector kila shim haka jingialang kaba kila pynlong haka jingdon lang baroh nong shong shnong jong ki 5 shnong ba kynthup ka Garopara, Balkham, Damrang, Dokholgre bad ka shnong Bhalukmari. Haba pynbna ia kane u president ka Tarabari Sector u Gupta Sangma ula ong ba ki nong shong shnong jong ki 5 shnong kila shah kyntait haka Meghalaya haka jingiapynbeit pud haka Phase I hynrei kim kwah satia ban don bad ka Assam.

“Mynta ngi la rai ban nym thep Vote shuh hapoh Assam hynrei ngi kwah ban thep Vote ha Meghalaya namar baroh ngi kwah ban don ha Meghalaya hynrei haduh mynta ngim pat ioh iaki EPIC na Meghalaya” la ong u Gupta. U Gupta ula pyntip ba hashuwa ka jingiasoi MoU ban pynbeit pud hapdeng ka Meghalaya bad Assam, ki Regional Committee jong baroh artylli ki Jylla kila buh ka jingkylli, la ki 5 shnong ki kwah ban don ha Meghalaya ne Assam.

Ula pyntip ba ki 5 tylli ki shnong haki jingialang bala pynlong daki Regional Committee kila rah kti ban pynpaw ba ki kwah ban don ha Meghalaya hynrei naka liang baroh artylli ki Sorkar Jylla ki khlem burom satia iaka rai jong ki paidbah. Halor kane u President ka Tarabari Sector ula kyntu iaka tnat ilekshon ka Sorkar Meghalaya ban shim khia ban pynioh EPIC iaki nong shong shnong ban ioh thep Vote haka 19 tarik mynta u bnai. Haba iadei bad kane ki tyllong khubor ki iathuh ba ki 5 tylli ki shnong ki thep Vote MLA hapoh ka Jylla Assam.