Ka iing dorbar thawain hynne ka sngi ka la kyntait ia ka Amendment Motion jong ka Voice of the People’s Party (VPP) ba tyrwa ban kham pynjlan ia ki sngi shong dorbar synrai. Ïa kane ka Amendment Motion la wanrah da u MLA ka VPP na North Shillong constituency u Bah Aldelbert Nongrum. U Lamphang Iing dorbar u Thomas A Sangma ula pynbna ka iing ka la kyntait ia katei ka Amendment Motion hynrei lada don ki kam ba kyrkieh u kular ia u Bah Adelbert ban pynjlan ia ki sngi shong dorbar.
Wat hapdeng ka jingkyrpad u Lamphang ban weng noh ia ka motion, u MLA ka VPP na North Shillong Bah Adelbert Nongrum ula ong “Nga burom ia ka jingkyrpad jong phi hynrei ngan ym weng satia ia ka amendment motion”.
Haba wanrah ia ka Motion, u Bah Adelbert ula ong ba ka jingbuh tang 5 sngi ia ka dorbar bad ai tang 2 sngi ban iakren ia ki kam ki MLA shimet, ka por ka la lyngkot palat ia ka Iingdorbar ban ai ka jingleh hok sha kiba bun ki kam kiba kongsan jong ka Jylla kiba donkam ban hap iakren kyrkieh hapoh ka Iing dorbar kaba iakynduh tang arsien ha ka shisnem. Haba jubab, u Symbud Myntri Rangbah ba khmih ia ka Parliamentary Affairs Bah Prestone Tynsong ula ong ba ka BAC kala dep iakren bniah bha ia baroh ki kam bad ha ka Dorbar Synrai bala dep ruh, ki sngi bala buh ban shong dorbar ka long 5 sngi.
