U Myntri ka Tnad Pule Puthi uba dei ruh u Nongialam ka National People’s Party (NPP) u Rakkam A Sangma ula kyntait iaka jingkynnoh ba donkti kynshoit pher Jaidbynriew ha ka por ba ialap ilekshon Lok Sabha ha Ri-lum Garo.Kane kala mih hadien ba ka Liangpyrshah ka Voice of the People Party (VPP) kala rai ban ujor da ka ejahar pyrshah ia u Rakkam A Sangma halor ka jingkynnoh ba u kynshoit ban mih ka jingsngew iapher hapdeng ki Khasi bad ki Garo.Kane ka rai jong ka VPP ka dei kaba la pynshong nongrim na ka Video jong u Myntri, kaba la saphriang ha ki rynsan social media, katba u dang kren ha ka jingialang paidbah da ka ktien Garo ha ka por ialap elekshon.
Haba ktyntait iaka jingkynnoh ka VPP u Rakkam A Sangma ula ong “Nga kyrmen ba ki (VPP) ioh ia ka Video ba pura bad ka jingpynkylla ktien kaba dei ia ka jingkren jong nga”.U Rakkam ula ong “Nga khlem kren bakla eiei ruh em, hynrei ban pynkut ia ka jingleh Politics phiah bad sngew iapher jaidbynriew jong ka VPP da kaba iatylli lang na ka bynta ka Kong Ampareen kaba iakhun haka ilekshon MP na Shillong”.
U Myntri ula ong ruh ba ka VPP kala dei ban mudui ia ka jingujor hakhmat u Returning Officer (RO) ha ka por ilekshon hynrei mynta ka ilekshon kala kut.“Namar kata, ka long kaba kongsan ban nang bad sngewthuh ia ki ktien jong kiwei ruh” ula bynrap.
