U Symbud Myntri rangbah ka jylla uba dei ruh u General secretary ka NPP u bah Sniawbhalang Dhar u la kyntait ia ka jingkynnoh u bah Vincent H Pala, u President ka MPCC, ba u dei u nongaiktien ka seng RSS bad ka BJP. U bah Sniawbhalang haba kren sha ki lad pathai khubor ula ong ba ka jingkynnoh jong u bah Pala ka long kaba bakla.U la ong ba kum ka party ki iatreilang ha ka sorkar bad ka BJP na bynta ki kam pynroi ka jylla, bad kum ka jylla kaba rit, ka Meghalaya ka donkam ia ka jingkyrshan ka sorkar pdeng bad, kam mut ba dei u nongaiktien jong ka BJP ne ka RSS.
U la ong ba kum u briew, u ju burom ia u bah Pala kum u President ka MPCC hynrei kaba sngew kyndit ka long kumno u pynmih kum kine ki ktien laplah ki ktien kamkai, ki bym sngew tynnad ban sngap. U la ong ba ka longiing jong u ka wan na ka kam khaii pateng kum ka kompeni shna surok ha kaba pyrthei ka tip ia kane. “Ka jingkynnoh bamsap, na ki drok beain, ka long kaba bakla bad ka long kaba sngewsih ban mih ka kyntien na u kum u rangbah,” ula ong.
Ha kajuh ka por, u la ther ia u bah Vincent ba hapoh ka jingialam jong u kum u President ka MPCC haduh ba ki MLA, ki MDC kila phet lut na ka Congress. U bah Sniawbhalang u la ong, “Ha ka jingshisha, u (Bah Pala) dei ban pyrkhat shwa ialade, namar ba mar syn shimti ia ka kam President, mih 12 ngut ki MLA na ka Congress bad ha ka elekshon 2023, ki MLA ki rung sha ka NPP, kane ka paw ba um lah ban peit ia ka iing lajong bad mynta 3 ngut ki MLA ki rung sha ka NPP, bad kaei kaba bakla ha ka iing jong ka Congress. Kane ka dei ka jingleh ka Congress bad ki la kynnoh pynban ia ka NPP. Ka jingkren ia ki ktien khlem akor, kynnoh bamsap, u dei ban sei ia ki sakhi satar.”
