U MLA ka Amlarem Constituency uba dei ruh u nongaibuit ka sorkar Jylla u Lahkmen Rymbui, hynne ka sngi haba sakhi kum u kongsan haka jingiakynduh lang ki khun kynthei ka Seiñraij Jowai, bala pynlong daka Women’s Welfare Organisation ka Seiñraij Jowai ha Dorbar Hall ka Seiñraij, ula kyntu iaki longkmie ban pdiang iaki jingkylla katkum ka jingiaid ka juk, namar ha ki 50 tylli ki snem bala leit la bun bha ki jingkylla, da kaba u ai nuksa ia kiei kiei bala ia sakhi lang, kum ka jingkylla haka rukom Behdeiñkhlam, ka Shad Sukra, ka rukom wad kam wad jam, ka pule puthi bad kiwei. Bad napdeng baroh ki jingkylla u ong, kaba sted tam eh tang hapoh kine ki 5 snem dei ka social media kaba ha kajuh ka por ka iarap ia u briew bad ruh ha kajuh ka por u hap ban phikir bha na ka.
Nangta haba iaroh iaka WWO kaba shimkhia ban pynkup ruh iaki khun ka Seiñraij kiba poi shakhmat haki kyrdan pule bapher bapher naduh ka SSLC, HSSLC, Graduate bad phD, u kyntu ruh iaki longkmie kumjuh kiba shah pynkup burom ban pdiang ia kiei kiei ba jia haka jingim daka jingkyrmen ban lah lehbha shakhmat, ryngkat ka jingtrei shitom, ym ban khñium ne kdew kti, namar ka jingkhñium bad kdew kti ka pyntlot bad pynjem daw ialade. Shuh shuh u ong haka juk ba mynta ka sap ba u briew u don ruh dei kaba kongsan eh namar ka plie lad bad pynkupbor ia u briew ban trei ia kano kano ka kam khnang ban im, kumta dei ban mih shakhmat naka bynta ban pynjanai iaka sap.
Ha ka jingialang ba pyniaid daka Chairperson ka WWO, ka Dr. Wa i sa Sumer la ioh ruh ka jingnguh Blei na ka Hima Lakiang Treasurer ka WWO, ka jingkren na Wompher Laloo Principal Seiñraij Higher Secondary School Jowai, kaba la pashat ia ki kyntien halor ka bynta ba kongsan ki kynthei bad longkmie la ha ïing ha sem ne haka imlang sahlang, ka jingkren na u President ka Seiñraij Jowai, u H Toi bad na u Dr. Chanlang Bareh uwei napdeng kiba shah pynkup burom ha kane ka sngi. Ha kane ka sngi nalor ka jingpynkup burom iaki 17 ngut kiba la pass bha haki kyrdan pule bapher bapher, ka Women’s Welfare Organisations, Seiñraij Jowai kala pynkup burom ruh iaka Aloma Passah bad ka Lamabai Lakiang kiba long Chairperson bad ka Secretary ba nyngkong duh haki snem 1989-90.
