Wat la ka thaiñ Laitumkhrah ka dei ka thaiñ ba bun tam ki jaka Pule, hynrei lah ban ong ba ka surok ha Laitumkhrah naduh Police Point ter ter shaduh Beat House ka la kylla rit noh namar ka jingdon ki nongdie madan kiba die jingdie harud surok. Ka Laitumkhrah ka don ka iew ba die ia ki mar baroh kynthup ki marbam bad ka don ruh ka Laitumkhrah Market Complex ïa kaba la shna lyngba ka Smart City project ha ka jinglut kumba T.38 klur ïa kaba shen yn plie paidbah hadien ba la dep ban shna ia baroh ki jingdonkam. Ka jingkylli ka mih mynta, hato ka Sorkar ka lah ne em ban weng ia ki nongdie madan kiba iai kytur pud sha ki surok bad ha ki jaka iaid kjat (Footpath), hadien ba la plie paidbah ia ka Laitumkhrah Market Complex. Kam long kaba bakla ban ong, ba kane ka jingkyntur pud ki nongdie madan, ka la pynkhapngiah bad ka pynthut ia ka iaid ka ïeng ki briew bad ki kali.
La ïohi ba don ki Nongdie madan kiba pynieng ia la ki jaka buh tiar kum ki jhur, soh, doh, ki jain bad kiwei ki mar jingdie harud surok bad kumjuh ruh ha ki lynti iaid kjat kaba pynlong ia ka surok ban kylla rit noh. Dang shen u Myntri ka tnat Tourism u Bah Paul Lyngdoh ula pynbna ba ka Sorkar kan pynkylla ia ka Khyndai Lad kum ka jaka iaid kjat (Pedestrian Zone) da kaba kyndang lut ïa baroh kiba die madan ha katei ka thaiñ hadien ka jingkynriah ïa kumba 200 ngut ki nongdie madan kiba dei hok ban ioh jaka sha ki 3 tylli ki jaka ba ka Sorkar ka la dep ban ithuh.
Haba ia dei bad ka jingkhapngiah ka surok ha Laitumkhrah u Myntri ka tnat Tourism u Bah Paul Lyngdoh ula ïathuh ba ka MLA jong ka thaiñ kaba dei ruh ka Myntri Sorkar ka la wanrah ïa kane ka mat sha ka jingïalang ka kynhun Myntri. La sngewthuh ba ka jingtei ia ka Laitumkhrah Market Complex kan long ka lad ka lynti ban pynkylluid ia ka surok da kaba kynriah ne beh ïa baroh kiba shongdie madan ha kylleng ka surok hapoh ka thaiñ Laitumkhrah.
