Kyrmen ban jop biang na ka Shillong Seat, ka jingrem u Pala ha ka ilekshon MLA kam ktah ia ka MP:MPCC   

U nongialam ka Congress Legislature party (CLP) u Bah Ronnie V Lyngdoh, u la pynpaw ka Congress ka don jingkyrmen ban ioh biang ia ka jingjop na Shillong Parliamentary Seat ha ka ilekshon MP Lok Sabha 2024. Haba kren sha ki lad pathai khubor, u Bah Ronnie u la ong ba kane kam dei ka sien banyngkong ba ka Congress kan iakhun pyrshah bun ngut ki kyrtong na ka Shillong Seat, “ namar phi la iohi hi ka Congress ka ioh beit ka jingjop namar ki paidbah ka rilum Khasi bad Jaintia Hills ki stad ban jied”. “Ki paidbah ki sngewthuh, lada phah da kiwei ki MP na kiwei ki National Party, Ngam tip haduh katno kin lah ban wanrah jingmyntoi ia ka Jylla, Hynrei lada phah da u MP na ka national party kum ka Congress, ki MP ki lah ban iakren ia ki mat namar ym tang ki MP hynrei ka Party ruh ka ieng lang ban kyrshan ia la ki MP” la ong u Bah Ronnie.

U Bah Ronnie u la ong, ka jingshah rem u Bah Vincent Pala ha ka MLA ilekshon 2023 kam ktah ia ka ilekshon Lok Sabha da kaba ong, “U khlem rem bun ki Vote ha ka ilekshon MLA Sutnga-Saipung bad baroh ki tip kumno ka Politik ka long ha Jaintia Hills.” Haba kylli, u Bah Ronnie u la ong, ki MLA kim lah ban pynthikna ba ki paidbah kin jied iano ha ka ilekshon MP.“Ha ka ilekshon MP sha Lok Sabha, don u wei MLA na ka Sorkar MDA u la ong ba ki don bun ngut ki MLA bad MDC bad ki la thikna ban jop hynrei u kyrtong jong ki u la rem namar kane kiba la shah jied ha ki paidbah kim lah ban pynthikna ba ki paidbah ki jied iano ha ka ilekshon MP. Mynta ka kynti ruh ki paidbah ka Meghalaya kin jied ia ka Party ka ban pyrshah ia ka UCC, CAA bad iaka Party kaba ieng ban ialeh pyrshah ia ka jingshah leh donbor ki rit paid bad ki rit niam” u la ong.

Haba iadei bad ka jingpynslem ka Sorkar Pdeng ban pynurlong ia ka Resolution ba la mynjur da ka ïing dorbar ban pyntreikam ia ka inner line permit (ILP), u Bah Ronnie u la ong, “Kane ka pynpaw ba kim shimkhia ban iada ia ki rit paid ka Meghalaya. Kane ka jingdawa kam dei ka jingdawa hapoh surok hynrei ka dei kaba la mynjur da ka ïing dorbar jong ka Meghalaya. Kane ka pyni ba ka BJP kam khein snep wat ia ka ïing dorbar. Kane ka pyni ka jingsynshar donbor ka BJP”. Na ka liang u MLA ka Gambegre Saleng A Sangma u la ong, ba ka Congress kan bteng ban iakhun ia ka jingdawa ban ioh jingithuh ia ka ktien Khasi bad Garo ha ka khyrnit ba phra ka Riti synshar ka Ri India bad ka jingpyntreikam ILP ha Meghalaya.