Shisngi hadien ba lait na phatok, ka myntri rangbahduh barim ka ri Bangladesh bad ka chairperson jong ka Bangladesh Nationalist Party (BNP) ka Khaleda Zia hynne ka sngi ka la ai jingkren ha ka jingialang paidbah ka party ha thain Naya Paltan lyngba ka video. Kane ka dei ka sien ba nyngkong ba ka Khaleda 79 snem ka rta, ka la ai jingkren paidbah ha ka jingïalang saiñ pyrthei hadien hynriew snem shiteng ba shah set phatok halor ka mukotduma bamsap ha u bnai Ramphang, 2018. Ka Khaleda ka dang shah sumar ha Evercare Hospital, la pyllait noh ha ka sngi ba-ar hadien ba u President u la pynmap ia ka jingpynshitom ia ka, kata shisngi hadien ba ka Sheikh Hasina ka la iehnoh kam kum ka Myntri Rangbahduh bad ka la phet krad na ka ri na ka jingiakhih paidbah. Ka Khaleda Zia ka la ai khublei ia ki samla pule bad ki paidbah kiba iakhih halor ka jingpynkhyllem ia ka sorkar Awami League bad ka la kyntu ba kin buh sharud ia ka jingkput ban siew kylliang.
“Ka la kyntu ïa baroh ba kin long kiba ïaishah bad ban ïatylli ban pynleit jingmut ban tei pat ïa ka Ri,” ong u secretary general ka seng u Mirza Fakhrul Islam Alamgir. “Ka Khaleda Zia ka la ioh passport jong ka wat hapdeng ka jingpynjynjar ka sorkar da ki bun bun sngi. Ngi dang pynkhreh ban rah shabar ban ioh jingsumar kham bha. Hynrei ki doktor kim pat ai lad leit da ka liengsuin. Wat la katta ngin bud dien ia ka koit ka khiah bad ngin pynbeit da la ioh jingbit,” ula bynrap. Katkum ka jingong u Fakhrul, ka Zia ka la pynthikna ban iada ia ki temple bad kiwei kiwei ki jaka mane blei ha baroh kawei ka ri.
“Ka la ong ka seng ka la rai ba ka Chhatra bad ka Jubo Dal kin ym donkti ha kino kino ki kam thombor ia ki rit paid. Kaba kongsan ka long donkam ban iada ia ki,” la bynrap biang u Fakhrul. Ka kyrmen ba ka jinglong jingman kan wan phai biang sha ka jingshong suk, ki samla pule kin wan phai biang sha ki klas, ka jingjied ia ka sorkar ka shong ha ki paidbah ban wanrah ia ka synshar ba khuid ha ka Ri, la pynkut u Fakhrul.
