U Myntri uba long ruh u MLA ka thain East Jaintia Hills u Bah Kyrmen Shylla u la ong ba ka Sorkar Jylla ka dei ban bishar biang bad wanrah ia ka jingpynkylla ia ki kyndon ban sdang tih dewiong katkum ka juk stad saian ba mynta (Scientific Mining).
Haba kren ha ki lad pathai khubor u Bah Kyrmen ula ong, ba u sngewkmen ban iohi ba ki paidbah kim pyrshah ia ka ‘Public Hearing’ ban sdang ia ka jingtih dewiong katkum ka juk stad saian ha kane ka jylla Meghalaya.
“Ha ka ‘Public Hearing’ ki paidbah ki la pynpaw ia ka jingshaniah ha ka Sorkar Jylla ba kan sdang noh ia ka jingtih dewiong katkum ka juk stad saian hynrei tang kawei ka jingsngewkhia kaba ki pynpaw ba kumno ka jingtih dewiong ka dei ban sdang” u la ong.
U Bah Kyrmen ula pynpaw ia ka jingsngew skhem ba ka Sorkar Jylla ne ka tnat ba dei peit kan kohnguh ia ka jingkyrpad jong ki paidbah ban leh ia ka jingpynkylla khyndiat lada donkam ia ki kyndon ban sdang tih dewiong.
“Ia mynta ki paidbah ki kwah ban ïohi kumno ka jingtih dewiong ka dei ban sdang bad kumno kan long. Nga ai khublei ïa u Myntri Rangbah ka Jylla uba la leh ïa kaba bha tam bad uba la wanrah ïa ka hok sha ki paidbah” u la bynrap.
U Bah Kyrmen u la ong haba ia dei bad ki ain jong ka Sorkar Pdeng kiba donkam ban bud, bun sien ka shim por bad haduh mynta tang 4 ngut ki la pyndep ia ki rukom treikam ba donkam bad ka Sorkar Pdeng ban sdang ia ka jingtih dewiong.
U la pyntip ba ki don bun ki nongaplai laisen ban tih dewiong hynrei haduh mynta tang 4 ngut kiba la lah ban pyndep ia ki jingdonkam baroh.
