Kyrmen u MR ha ki san snem, kan don ka jingkylla ha ka pule puthi

U Myntri Rangbah ka Jylla u Conrad K Sangma u la plie ia ka Academic Block bad ia ka Girls’ & Boys’ Hostel jong ka Captain Williamson Sangma Government College. Ha katei ka jingialang la donlang u Myntri ka pule puthi u  Rakkam A Sangma, u Myntri barim ka pule puthi uba long ruh u MLA ka Amlarem & Chief Advisor ka Sorkar Jylla u Bah Lakhmen Rymbui, u MLA ka Baghmara u Kartush R Marak, u Chief Secretary ka jylla u Bah DP Wahlang, ki heh ophisar sorkar bad kiwei kiwei. La tei ia ka Girls’ & Boys’ Hostel da ka jingbei tyngka ka NEC ha ka jinglut ba T. 1.20 Klur. Haba kren ha ka jingialang u Conrad K Sangma ula ai burom ia la u Kpa u (L) P.A Sangma ha ka lyngkhuh sngi iap ba 8 bad ula ong ba ka dei ka jingiohi jngai bad ka jingngeit jong u PA Sangma ula shim khia ban kyntiew shaphrang ia ka pule puthi ha ka jylla bad ula buh ia u maw nongrim ia kane ka College ha u 2008.

U Myntri Rangbah ula pynpaw ia ka jingsngewnguh ia u Myntri barim ka pule puthi bad ia ka kynhun kiba la sdang ia ka jingpynkylla ha ka pule puthi bad ula ong, ka thong ba la buh da ka tnad pule puthi ha ki 5 snem ba la dep, la pyniaid shaphrang mynta haduh kine ki sngi bad u kyrmen skhem ba kan don ka jingkylla kaba heh ha ka pule puthi ha kine ki sngi ban wan. Ula ong, ka sorkar ka buh hakhmat eh ia ka pule puthi bad ka sorkar ha u snem 2020 ka la kyntiew ia ka jingbhah tyngka na ka T.27 Klur sha ka T.350 Klur bad ka sorkar ka la bhah T.3000 Klur na ka bynta ki jingpynlut ha kaba ia dei bad ki samla. U Myntri Rangbah ula iathuh, ba ka Kynhun Myntri shen kan sa mynjur ia ka jingtyrwa ban buh ia ka Science bad Commerce Stream ha Sohra, Williamnagar bad Baghmara College.

La sdang ia ka Captain Williamson Memorial Government College ha u snem 1994 bad la shimti da ka sorkar ban pyniaid naduh u snem 2008. Ka sorkar ka la rai ban kyntiew noh ia ka Captain Williamson Memorial Government College ha ka jinglut ba T.10.80 Klur, ka jingthmu ka long ban iaid ryngkat bad ka jingbthah jong ka NEP 2020 ban pynbiang ia ka jingpule ha ki lain bapher bad ban kyntiew ia ka GER ha ka Higher Education ha ki District da kaba thaw ia ki Academic Block bathymmai.