Khnang ba kito ki samla pule kiba wan na ki longiing baduk kin ioh lem ia ka lad ban bteng ia ki kyrdan pule kiba kham shakhmat lyngba ka skulbah University of Science and Technology Meghalaya (USTM), mynta ka 11 Risaw ki nongialam ka Hynñiewtrep National Youth Front (HNYF) ki la leit ban kynduh markhmat ia u Chancellor katei ka skulbah bad ban buh ia ka jingkyrpad ban iarap ne ailad ia ki samla khasi ban bteng ia ki jingpule ha ka dor kaba bit. Ha kane ka jingleit ia kynduh ia u Chancellor ka USTM u M. Hoque, na ka liang ka HNYF la lamkhmat da u Bah H Lyngdoh, President ha ka jingiadonlang ruh u Bah Alfred Mallai, General Secretary, u Bah M. Manih, Vice President Sengkmie nalor kiwei kiwei.
Haba kren sha ki Lad Pathai Khubor, u Bah Alfred Mallai, u la pynpaw ba ka seng hi ka don ia ka jingsngew kit khlieh na bynta ban kyntiew lem ia ka pule ka puthi kumta kum kawei na ki sienjam ka la leit ban ia kynduh bad ban pynpaw ha u Chancellor ka USTM ha kaba ia dei bad ka jingthrang ki khun samla ban bteng ia ki kyrdan pule kiba shakhmat hynrei tang namar ka jingbym lah kot bor jong ki ban siew ia ki jingsiew kiba heh, ka jingphohsniew jong ki ka shu kut noh ha ka jingumdum. U la iathuh ruh, ba ha kane ka jingiakynduh ia u Chancellor, ka seng ka dap da ka jingkmen namar ba u M. Hoque u la kular ban ai ka jingiatreilang da kaba yn pyrkhat kyrpang ban iarap bad ban ailad ia ki samla khasi khamtam na Ri Bhoi District kiba kwah ban bteng ia ki jingpule jong ki ha kane ka skulbah jong ka USTM, kaba dei ka skulbah ka la pdiang ia ki kyrdan pule bapher bapher kynthup naduh ka Medical College bad kiwei kiwei.
Shuh shuh ruh, na ka liang ka HNYF ka la kyntu ia kito ki samla pule kiba angnud ban leit pule ha ki kyrdan bapher bapher ba kin shim ia kane ka kabu ban ioh leit pule ha kane ka skulbah jong ka USTM khamtam kito kiba angnud ban leit pule doctor bad lada don kano kano ka jingdonkam ki samla ki lah ban ia kynduh ia ki nongialam jong ka seng ha kano kano ka por.
