U MLA ka South Shillong constituency u Bah Sanbor Shullai hynne ka sngi, ula kynduh ia u Symbud Myntri Rangbah ba khmih ia ka tnat PWD (Roads) u Bah Prestone Tynsong.
Ha kane ka jingkynduh, u Bah Sanbor ula kyntu ia ka Sorkar Jylla ba kan shna thymmai noh ia baroh ki surok PWD kiba don hapoh ka South Shillong constituency.
“Nga la kyrpad rit ia u Symbud Myntri Rangbah ba khmih ia ka tnat PWD (Roads) u Bah Prestone Tynsong ban sngewbha mynjur lem ia ka jingkyrpad ban shna thymmai noh ia baroh ki surok PWD hapoh ka 19th South Shillong constituency” la ong u Bah Sanbor.
U Bah Sanbor ula ong ba baroh ki surok PWD barim kiba hap hapoh ka Municipal area ha ka constituency ki dei kiba la shu maramot beit na ka por sha ka por la bun snem.
Ula iathuh ba kila don ka South Shillong Constituency kala don ka jingkiew ha ka jingdon ki Homestay jong ki nongshangkai pyrthei, ki lodge bad ki guest house hapoh ka constituency.
Nalor kane, u Bah Sanbor ula ong ba kane ka jingkwah ban shna thymmai iaki surok hapoh ka Constituency kadei ruh namar da ka jingwan jong ki project kum ka Ropeway na Lum Shillong sha Madan Laban (Raid Laban) bad kiwei ki surok ba kongsan kiba iasoi kawei ia kawei pat hapoh ka South Shillong, ka constituency kan sa kyntiew bha iaka kam jngohkai bad kan sa iarap ruh ban wanrah ia ka jingkylluid ia ka Nongbah Shillong.
