Ka Meghalaya SSA School Association (MSSASA) hynne ka sngi kala pynpaw ka jingkyrshan iaka rai jong ka tnat pule puthi ban pyntreikam daka Teacher Information Management System (TIMS) Application. Ka jingpyntreikam daka TIMS kadei ban wanrah ia ka jingtreikam/leit skul kaba thikna (accountability) jong ki Nonghikai. Ka rukom pyntreikam iaka TIMS kadei ban pynthikna ba baroh ki nonghikai SSA hapoh ka Jylla ki dei ban ai kyrteng haba ki wan skul.
Kane ka App kan pynthikna ia ka jingbuh jingthoh ia ka jingpoi skul jong ki nonghikai, ka ban pyniasoh pat bad ka jingpyllait ia ka tulop lyngba ka Payroll & Employee Management System (PEMS). Haba pyntip baka MSSASA ka kyrshan iaka rai jong ka tnat pule puthi ban pyntreikam daka TIMS, u President ka MSSASA u Bah Aristotle Rymbai u la ong “Kane ka dei ka rai kaba biang bha bad kane kam dei shuh kaba thymmai bad kadei ka rai kaba biang tam ba shim daka tnat Pule Puthi”.
U Bah Aristotle u la iathuh ba hashuwa ban pyntreikam iaka TIMS ka Sorkar Jylla lyngba u Director kala khot iakren halor kane ka App ban buddien iaka jingwan skul, ki Nonghikai SSA hala ki skul.
