Ki paidbah jong ka thain Maweit ryngkat ki nongialam shnong, ki sengbhalang bad ki khun samla jong ka thain ki la ieng tylli kawei ban ai jingkyrshan ia ka Environmental Public Hearing ba la pynlong ha Sdad Dkhar, West Khasi Hills District shwa ban sdang noh ia ka jingtih dewiong kaba long katkum ka juk stad saian lane ka scientific Mining na ka bynta ka Pyndengshahlang Coal Block ka ban pyntrei da u Bah Shiningstar Khardewsaw kum u trai jong katei ka project. Ïa katei ka Public Hearing la khot pynlong da ki Meghalaya State Pollution Control Board ha kaba la pyniaid ia ka jingialang da u Bah M. A Challam, Addl. DC ka WKH ha ryngkat ka jingiadonlang u Bah Y.F Laloo, Environmental Engineer, Meghalaya State Pollution Control Board, U Dr. G. H Chyrmang, MFS, Member Secretary, MSPCB, u Bah S. Syiem, Environmental Engineer, MSPCB bad kiwei kiwei.
Ha katei ka sngi la sakhi ba ki paidbah jong ka thaiñ Maweit bad ki shnong ba marjan, ki nongialam shnong, ki nongialam sengbhalang, ki rangbah kur, ki khun samla jong ka thain ki la pyni da ka mynsiem ba sngewkhia ban ai jingkyrshan ia katei ka jingpynsngew paidbah khnang ban ioh sdang biang ia ka kam tih dewiong kaba la shah khang mynta la palat 10 snem ha ka National Green Tribunal (NGT). Ki nongkren kiba dei ki trai shnong na katei ka thain, ki la pynpaw ia ki jingeh ba ki paidbah nongshong shnong ki la mad baroh shikatta naduh ba la shah khang tih dewiong, ha kaba kane ka la ktah syndon ia u khiew ja jong ki bad ka la ktah ruh ia ka pule dangle jong ki khun ki kti namar ki kmie ki kpa kim lah shuh ban kyrshan ia ki, ba kin dang bteng ia ki jingpule ha ki kyrdan ba kham shajrong.
Haba iohi ia ka jingeh ba ki paidbah ki la mad baroh shikatta na ka jinghiran ka ioh ka kot, na ka liang ki sengbhalang bapher bapher, ki nongsynshar shnong, ki khun samla bad ki paidbah jong katei ka dong ka thain ruh ki la ieng tylli mlon kawei ban pyni ba ki kwah ban sdang biang ia ka kam tih dewiong hapoh ka thaiñ. Ha katei ka sngi la ioh ban pynsngew ruh ia ka Environment impact Assessment (EIA) na ka liang jong u Project proponent bad la iashim bynta ban ai jingkren da ki nongkren bapher bapher kynthup u sordar shnong SdadDkhar, u gent kur Diengngan na Porkhadoh u bah H. N Diengngan, Sordar Porkhadoh Bah Marius Puweiñ, Sordar Maweit bah Sirbus langrin, Secretary Nongsynshar Shnong Maweit bah Orius Thongni, Ulysis Uyntong chairman Rilyngngam trader Association, President KSU Porkhadoh Sdaddkhar Area W. Diengngan, President HANN bah Gabriel Sohlang bad kiwei kiwei.
