Ka Ri India kadei ka Ri laitluid bad ka Ri synshar paidbah, ka bym khien kordor tang ia kawei ka niam, namar kam iahap ban ialap ba kano kano ka jaka kadei tang jong kawei ka niam. Ia kane la ong da u Myntri ka tnat kam jngohkai pyrthei u Bah Paul Lyngdoh haba pynpaw iaka jingsngewdei iaka Dorbar Shnong Mawsynram kaba la pynbna baka Krem Mawjymbuin kamdei ka jaka lehniam hynrei kadei ka jaka jngohkai pyrthei.
Haba kren sha ki lad pathai khubor, u Bah Paul ula ong baka Krem Mawjymbuin ha Mawsynram kadei shisha ka jaka jngohkai pyrthei kaba la pawnam bha bad kan ktah shibun lada pynkylla iaka krem tang ka jaka lehniam.
U Bah Paul ula kubur ruh ba haduh mynta ka Dorbar Shnong Mawsynram kam phah ktien shaka Sorkar Jylla naka bynta ban iarap pynneh pynsah ne pynkylla dur iaka krem Mawjymbuin ban khring shuh shuh iaki nong wan jngohkai pyrthei.
