U Nongialam ka seng Congress u Bah Vincent H Pala hynne ka sngi, ula ai ka jingkyrshan ia ka jingdawa u Nongialam ka Liang Pyrshah u Dr Mukul Sangma ban phah tohkit bniah halor ka jingkynnoh pyndonkam bakla ia ka pisa be-ain na u drok bad u dewiong bad kam kontrak da ka seng National People’s Party (NPP) ban khring ia ki MLA na kiwei ki seng saiñ pyrthei. Haba kren bad ki nongthoh khubor u Bah Vincent Pala ula ong, “Nga ai ka jingkyrshan pura ia ka jingdawa u Dr Mukul ban thaw kynhun tohkit bniah. Ka jingtohkit ka dei ban long na ka bynta ki 10 snem kiba la leit”.
Kum ban shu kdew, u Dr Mukul ula byrngem ban phah da ka jingthoh sha u Myntri Rangbahduh ka ri ban don ia ka kynhun tohkit bad ban shimkhia halor ka jingkynnoh u Bah Pala ba ka NPP ka la pyndonkam da ka pisa be-ain kaba la lum na u dewiong, u drok bad ka jingai kam kontrak ban khring ia ki MLA na kiwei pat ki seng sha ka NPP. U MP barim ka jylla, ula pdiang sngewbha ia kano kano ka jingtohkit halor kane ka kam,
“Ngan iathuhba ka jingtih dewiong be-ain ka la sdang ha ki 10 snem. Ka jingshalan be-aiñ ïa u dewïong ka la long ha kine ki 10 snem ba ladep, u drok u lah palat ia ka 10 snem” ong u Bah Pala. U la pynpaw da kaba ai nuksa, “Lada phi rah ia ka syiar na Guwahati sha Shillong phi hap ban siew T.20,000 ne T.30,000 shi Pickup. Ka la mih ha ki Social Media ha ki khubor. Ka jingkit ia u dewiong na Jaintia Hills sha Guwahati, phi hap ban siew T.96,000. Ka la don ha ki Social Media. Lada ngi hap ban kit ia u mawshun na Jaintia Hills sha Guwahati, phi hap ban siew T.20,000. Ka la don ha ki khubor. Lada phi kit ia u shyiap ne uno uno phi hap ban siew. Kumta baroh ki dei ki jingrung bad katei ka jingrung ka la sdang ha ki 10 snem ba la dep”.
