U Symbud Myntri Rangbah ka jylla u Bah Sniawbhalang Dhar uba khmih ia ka Kam Pynroi Sor ula ong, ba ka sorkar kala dep ban ithuh ia ki katto katne tylli ki jaka ha ka nongbah Shillong na ka bynta ban pynkynriah noh ia kiba shong die madan ha kylleng jongka sor Shillong.“Kumba long mynta hi, na ka liang ka tnad sorkar, ngi dang pyrshang ban wad bad ban ithuh ia ki katto katne tylli ki jaka kiba kham biang na ka bynta kiba shong die madan. Ynda ngi la ioh ia ki jaka kaba biang kaba kham wandur wander naka bynta jong ki nongdie madan kumta ngin sa pynkynriah noh ia ki ha kawei pat ka jaka bad kumta yndal ah dep pynkynriah ia kin gin sa ioh noh ia ka jaka kaba yn ym don shuh ki nongdie madan khamtam ha ki jaka kiba kham long syrtah” ong u Bah Sniawbhalang.
Ula ong mynta ki dang ia wad ia ki jaka bad kila don ki jaka kiba la rit palat katba don pat ki jaka ki bym ibiang bad kumta mynta kidang ialeh ban ithuh noh ia 3-4 tylli ki jaka ban ioh ban pynwandur pynwandur khnang ba kan long ka jingbha naka bynta ki nongdie madan. “Ngi lah pyrshang ban wad bad ban peit ia ka jaka ha ka Parking Lot jong ka MUDA, ha ki kiba tei thymmai ia ki Parking Lot bad ha ka thaiñ Anjalee hynrei ngim pat rai ha kano ka jaka yn pynkynriah ia ki hynrie ngidnag pyrshang ban buh ha ka jaka kaban long shi rta ia ki” la ong u Symbud Myntri Rangbah. Ula ong, ba ym kynmaw ia ka rekod kaba thikna jong ka jingdon jong ki nongdie madan kiba la dep ban ithuh da ka sorkar hynrei ula iathuh antad ba kidon kumba hapoh jong ka 200 ne 300 ngut eiei.
U Bah Sniawbhalang ula ong ba ka jingthmu jong ka sorkar ban pynkynriah ia ki nongdie madan kam dei tang ha Khyndailad hynrei kan dei ruh ia kiba shong die madan ha Motphran bad ha Laitumkhrah.“Ngi dang pyrshang ha Motphran, Laitumkhrah bad ha Police Bazaar na kata ka daw ba ka dang shim por ia ngi ban wad khnang ka sor baroh kawei kan itynnad. Ia ki briew jong ngi shano ngin bret ia ki ngi hap ban shimkhia naka bynta ka jongki, na kata kadaw ngi pyrshang ban peit naka bynta kaba bha na ka bha tam na ka bynta ka jong ki” la ong u Bah Sniawbhalang. Ha kaba iadei bad ka jingkren u Myntri ka Kam Jngohkai u Bah Paul Lyngdoh ba hapoh u bnai Jylliew yn pynkynriah noh ia kiba shong die madan, “Ka jingkren jong u Myntri ka tnad Jngohkai ka long kaba dei hynrei imat kan dang donkam por sa khyndiat imat kan ym pat dei ha u bnai Jylliew hynrei ngin pyrshang ban pynsted katba lah hi”.
Ula ong ba kan ym don ka jingeh ban pynkynriah ia ki nongdie madan da ka jingiakren sngewthuh jingmut lang namar ba ki ophisar sorkar kila dep ban shong jingialang bad ki nongdie madan bad da kawei ka jingmut ki nongdie madan ruh ki kwah ban ioh iaka jaka shong die jingdie kaba biang.Na ka liang u Bah Paul Lyngdoh ula pynpaw ia ka jingkhmih lynti ba yn lah ban pynkynriah ia ki nongdie madan ha u Bnai Jylliew bad bad iohi noh ba ka Khyndailad kan long kum ka Hawkers Free Zone ne ka bym don ki nongdie madan hapdeng jong u Naitung mynta u snem.Ula ong, ba kial don bun bun ki jingiakren bad ki jingialang bad la pyndep ia ka jingrejistar ia ki nongdie madan da kaba iaid ryngkat lang bad ki kynhun jong ki nongdie madan bad ia kumba 200 ngut eiei kin ioh ia ka jaka ban shong die jingdie. U Bah Paul ula ong ba ka sorkar kala dep ruh ban ithuh ia ki ktto katne ki jaka bad kila don ha ka lynti ban pyndep noh ia ki kam ki jam.
