JOWAI, Naitung: Ka Thomas Jones Synod College Jowai kawei naka shlem ai jinghikai bala iaid lynti naduh u snem 1997 naka bynta ban sam jingnang jingstad shaki samla pule ka Rilum Jaiñtia kumjuh kiba nabar mynta ka kynti kala ioh jingithuh naka sorkar Jylla kum ka People’s College, bad da kane ka jingioh jingithuh haduh kumba 24 ngut ki nonghikai kane ka college kin ioh jingiarap naka sorkar. Kumta kum ka dak jingsngewnguh iaka sorkar Jylla, hynne ka sngi ka Thomas Jones Synod College kala pynlong iaka jingialang ban ai khublei kyrpang iaka sorkar ha kaba u myntri ka tnat pule puthi ka Jylla, u Rakkam A Sangma ula long kum u kongsan, u MLA ka Jowai, u Wailadmiki Shylla kum u symbud kongsan, ryngkat ka jingdonlang u nongaibuit ka sorkar jylla u HM Shangpliang, u DC ka West Jaiñtia Hills, u BS Sohliya bad kiwei.
Ka Principal jong kane ka College, ka Dr. I Dkhar haba ai khublei iaka sorkar kala iathuh iaka jingiaid lynti kane ka college, bad ong ruh kumba long mynta kane ka jaka pule ka don haduh 110 ngut ki nongtrei ba kynthup ki nonghikai bad kiwei pat (Teaching & Non Teaching Staff) katba ki samla pule ha baroh lai tylli ki stream ka Arts, Science bad Commerce ki don 997 ngut. U Wailadmiki Shylla haba kren u pynpaw ka jingkmen bala poi thong ka jingthrang jingangnud ban ithuh ia kane ka college kum ka People’s College, bad ong ruh ba ka sorkar kala iarap shibun ki College hapoh Rilum Jaiñtia naduh ka Nongtalang College, ka Shangpung College, ka Jaiñtia Eastern College. U khmih lynti ba ka T. 2 Klur tam ban ai ka sorkar manla u snem iaka College kan pynmyntoi bha iaka College.
U Rakkam A Sangma haba kren kum u kongsan u ong kane ka kam kala long jop dei lyngba ka jingbud dieñ u MLA ka Jowai. U iathuh ruh ba haki san snem bala leit ka sorkar kala pdiang ban iarap haduh 21 tylli ki College ha kylleng ka jylla hapoh ka jingialam u myntri rangbah ka Jylla u Conrad Sangma.Shuh shuh ula ong ba donkam ban burom iaki jingshakri bala wanrah ki Missionary hapoh ka ri khamtam haka thaiñ mihsngi ba kila wanrah naduh ka Gospel, ka koit ka khiah bad pule puthi. Kiwei ba ai jingkren kynthup u HM Shangpliang, u Rev. C.L Laloo Moderator ka KJP Synod Mihngi, u W.E.H Lamin Vice Principal ka College bad kiwei. Ha kane ka sngi la aiti ruh iaka shithi People’s College Grant In Aid kaba naka sorkar sha ki 24 ngut ki nonghikai, bad la pynkupburom ruh iaki nonghikai bala ioh iaka kyrdan PhD.
