Ha ka sien banyngkong eh ha ka jingshakri jong ka Civil Hospital Nongpoh, mynta kane ka jaka sumar pang paidbah ka la plie pat sa ia ka jaka sumar pang ia ki khyllung kiba dang shu kha bad kiba don ki jingshitom kaba la tip kum ka Special Care New Born Unit (SNCU) ia kaba la plie ha ka 1 tarik Jymmang ha Nongpoh Civil Hospital.Kane ka jingplie pat sa ia ka jaka sumar pang kyrpang ia ki khyllung ba dang shu kha bad kiba don jingpang bapher bapher kan pynmyntoi shikatdei ia ki nongshong shnong ka Ri Bhoi District khamtam kito ki kmie ki kpa ba dang ioh khyllung kiba don ia ki jingpang bapher bapher bad kin ioh ruh ia ka jingsumar kaba khlem donkam kano kano ka jingsiew.
U Dr. HB Buam, paediatric bad Incharge kane ka SNCU, u la iathuh, ba ki bor ka Nongpoh Civil Hospital, ki la don ka jingthmu ban pyntreikam ia kane ka SNCU mynta la katto katne snem bad dei ha u ne u snem 2024 la lah ban pynurlong ia kane ka jingthmu ban buh ia ka jaka sumar pang ba kyrpang ia ki khyllung kiba dang shu kha bad kiba don ia ki jingpang bapher bapher.
U la iathuh ruh, kane ka jaka sumar ba kyrpang ia ki khyllung kiba dang shu kha bad kiba don ki jingshitom kum ka jingpang stem, ki bym iam bad kiwei kiwei yn lah ban sumar ha kane ka jaka sumar bad ban pynsuk ruh ia ki kmie ki kpa namar mynshwa la hap ban phah ne pynkynriah ia kine ki khyllung ba don jingshitom sha Bethany hospital ne sha Shillong bad ki kmie ki kpa ki mat jingeh shikatdei namar ki hap ban pynlut pisa na ka bynta kane ka jingsumar bad mynta kin lait ban siew namar ka jingsumar ha kane ka jaka sumar kan long ka bym donkam jingsiew eiei.
