La plie ïa ka OPD Block jong ka ARHI Multi Super Speciality Hospital

Ka long shisha ka jingkyrkhu kaba khraw na ka bynta ka jylla Meghalaya bad ruh ki jylla jong ka thain Shatei Lam Mihngi khamtam kito ki riew paidbah ba wan na ka longiing ba duna ka jingioh ba ha kane ka kynti kin sa ioh ban pdiang ia ki lad jingsumar kiba paka kumba ju long sha ki nongbah kiba heh ha ka ri India, hadien ba la lah ban plie paidbah shwa ia OPD Block jong kawei ka jaka sumar pang kaba thymmai ba la ai kyrteng kum ka ARHI Multi Super Speciality Hospital kaba don ha ka shnong Mawsmai, Ri Bhoi District. La wan ban plie paidbah ia kane ka ARHI Multi Super Speciality Hospital kaban don kumba 200 tylli ki jingthiah da u Bah AL Hek, Myntri ka tnad Animal Husbandry & Veterinary ka sorkar jylla Meghalaya u ba long ruh u wei na ki nongpeit nongkhmieh ia kane ka jaka sumar ARHI kum u kongsan, ha ka jingiadonlang ruh u Bah Sosthenes Sohtun, MLA ka Jirang Konstituensi, u Dr. Aman Warr, DHS ba la shongthait, u Rangbah Shnong ka Mawsmai nalor kiwei kiwei ki riew pawkhmat.

Lah ban kdew, ba ka ARHI Multi Super Speciality Hospital ka dei kawei na ki jaka sumar pang paidbah kaba thymmai, yn khmieh bad pyniaid ia kane ka hospital da ki nongpyniaid ba kynthup naduh u Bah AL Hek, u Aibansharai Nongsiej, u Dr. Mahamaya Prasad Singh, Dr. Sandeep Rai Das, u Dr. Jadunarh Burogohain, u Dr. Rubaiya Anam, u Dr. Simranjeet Singh, u Dr. Firoz Ahmed, u Kamal Goyal, u Parag Chutiya. Ha kane ka sngi, ba la sdang ban pyntreikam noh ia kane ka hospital la ioh ban plie shwa tang ia ka OPD Block bad yn sdang ban pyntreikam pura ia kane ka hospital kaba don 200 jingthiah hadien 2 ne 3 bnai, ha kane ka sngi ba la plie ia ka, u Fr. Pariesh Priest ka Byrnihat Parish u la shim ia ka bynta ban kyrkhu kyrdon ia kane ka jaka sumar kaban long ka jingkyrkhu bad jingmyntoi kaba khraw ia ki paidbah kiban sa ioh ia ki jingsumar pang ba bunjait kumba ki hospital kiba heh ha ki nongbah bapher bapher ka ri ki don.

Haba kren ha kane ka sngi, na ka liang u Bah AL Hek kum u wei na ki nongkhmieh nongpyniaid jong kane ka hospital bad ruh kum u Myntri ka sorkar jylla ha Meghalaya, u la pynpaw ia ka jingkmen kaba khraw ban sakhi ia ka jingnang iai urlong ka jingthmu ba bha jong u lem bad ka kynhun ban pynioh ia kane ka jylla Meghalaya bad ki jylla ka thain Shatei Lam Mihngi da kane ka jaka ai jingsumar pang ba bunjait ki jingsumar kumba long ha ki jaka sumar pang kiba heh hapoh ka ri India bad ka jingsumar ruh ka long kaba paka bad kaban pynsuk, pynmyntoi ia ki paidbah kiban wan shah sumar ha kane ka hospital.“La thaw ia kane ka jaka sumar pang kaban don 200 tylli ki jingthiah pang nalor kiwei kiwei ki jingdonkam kiba bun halor ka thong ba la buh kaba long ban shakri ia u paidbah lane served humankind bad ha kaba sdang mynta kan don shwa tang ka OPD hynrei yn sa nang plie suki suki ia kiwei kiwei ki lad jingsumar naduh ka jingsumar pang Cancer, ka Jingpang Klongsnam bad kiwei kiwei ki jingsumar kiba katkum ka juk kaba mynta ha ryngkat ka jingiatreilang ruh ki doctor kiba la paw ha kane ka ri bad ki jylla bapher bapher (Specialist)”, ong u Bah Hek.

Shuh shuh ruh, u la pynpaw, ba lyngba ka jaka ai jingsumar pang kaba heh hapoh ka jylla Meghalaya ymtang ba kiba wan ban shah sumar hangne kin ioh ia ka jingmyntoi hynrei lyngba kane ka jaka ai jingsumar kan ai jingmyntoi bad jingkyrkhuh ruh ia ki samla ha ka liang ka iohkam iohjam khamtam ki nongtrei kum ki Doctor, ki Nurse, ki Ward Boys, Ward Girls bad kiwei kiwei ki jingdonkam yn ailad shwa ia kiba na kane ka jylla bad ruh ia kito kiba na ki jylla jong ka thain Shatei Lam Mihngi katkum ki kyrdan pule ki jong ki. U Bah Hek u la ai khublei kyrpang ruh ia baroh ki 12 ngut ki nongmihkhmat kiban peit ban khmieh bad ban pyniaid ia kane ka hospital khamtam ka jingiadonlang ki Doctor Specialist kiba la rangbah bha ha ka kam sumar pang kan lah ban pynkot ia ka jingthmu kaba bha lyngba kane ka hospital bad u kyrmen ruh ba lyngba kane ka jaka sumar ki paidbah nongshong shnong jong ka jylla Meghalaya bad kiwei kiwei ki jylla kin ioh shisha ia ka jingmyntoi kaba khraw.