Ka sorkar ka la pynkhlaiñ ïa ki bor pulit na ka bynta ban synran ïa ka leit ka wan bad ka ïaid ka ïeng jong u MLA ka NPP na Sohra u bah Gavin Miguel Mylliem hadien ba ka seng HNLC ka la byrngem ban dkhat ïa ka jingim jongu na ka daw ka jingrai ka sorkar ban khang khyrdep noh ïa ka karkhana pynmih dew bilat ka Mawmluh Cherra Cements Limited (MCCL).
Haba ïakren bad u SP jongka East Khasi Hills u bah Sylvester Nongtnger u la ïathuh ba ki bor pulit ki la rejister case pyrshah ïa ka seng HNLC halor kane ka jingbyrngem pyniap ïa u Nongmihkhmat paidbah na Sohra.
Nalor kata u la ïathuh ba la pynkhlaiñ ruh ïa ki bor pulit ban synran ïa ka leit ka wan bad ka ïaid ka ïeng jong u MLA hadien katei ka jingshah byrngem.
Lah ban pynkynmaw, ha ka 29 tarik Nohprah 2023 ka seng HNLC ka la pynpaw ka jingpyrshah jur ïa ka jingthmu jongka sorkar ban khang khyrdep noh ïa ka MCCL bad ha kajuh ka por ka la bthah ïa u MLA ka Sohra ba u dei ban shim ka jingkit khlieh halor kane ka jingrai ka sorkar da kaba un hiar noh na ka shuki MLA bad lada um leh ïa kata ka seng kan sa leh ei ei pyrshah ïa u.
Ha kajuh ka por ka seng HNLC ka la tyrwa ruh ïa ki nongtrei ka MCCL ba kin pynïasoh noh sha ka seng HNLC bad ka seng kan siew tulop ïa ki 25,000 tyngka shibnai.
Kane ka jingleh jongka seng HNLC ka long hapdeng ba ka jingïakren ïasuk bad ka sorkar pdeng, sorkar jylla bad ka seng ka dang ïaid shakhmat.
“ Lada ka sorkar ka pynïaid shakhmat ïa ka kam ban khang dam noh ïa ka MCCL na ka liang u MLA ka Sohra u dei ban shim ka jingkit khlieh halor kane da kaba u dei ban hiar shuki noh kum u MLA ban pynpaw ïa ka jingpyrshah jur halor kane ka rai jongka sorkar” ong ka kyrwoh ba la pyllait da u General Secretary cum Publicity Secretary ka seng HNLC u samla Sainkupar Nongtraw.
Ha katei ka kyrwoh la maham ruh “ Lada u (Gavin) u kyntait ban hiar shuki, ka seng HNLC kan ym don jingkitkhlieh lada jia ei ei. Kumba ma phi bad ka sorkar jongphi phi la rai ban tep im ïa ka MCCL kumta ngi ruh ngim banse ban leh da ki kam namar ïa ki riewshet kylla dei ban ai jingsneng da ka jingiap”.
Nalor kane kat kum ka kyrwoh ba la pyllait da u bah Sainkupar la pynpaw ruh ba kumba ka long mynta ym i don lad don lynti shuh kumta ka seng ka buh jingtyrwa sha ki nongtrei kane ka karkhana ba lada ki wan ban pynïasoh bad ka seng ka seng kan siew tulop ïa ki 25 hajar tyngka shibnai bad kiba lah ban pynïasoh ki dei ban long 45 snem bad kiba la dep ruh ban pyntbit ha ki kam kilan met shipai bad lada ki pynpaw ba ki don shisha ka jingthrang ban shakri kat kum ki nongrim ka seng ka seng kan dang pyrkhat shuh shuh an ka bynta ka tulop jong ki.
Ka seng HNLC ka pynrem jur ruh ïa kane ka jingthmu jongka sorkar namar kane ka long thik kum ka jingthmu ban pynduh kam ïa ki paid nong Sohra khnang ba kin long tang ki mraw jongno re.Ha ka jaka ba ka sorkar kan buh thong hakhmat ban kyntiew bad pynkhlaiñ ïa ka MCCL, ka thmu pynban ban khang khyrdep katba ïa ki karkhana dew bilat ba long trai da ki bar jylla na kiwei pat ki jylla ka dang pyrshang ban kyntiew bad kane ka long thik kumba thombor ïaki jaidbynriew jong kane ka bri u Hynniewtrep. Kane kabuh ha ka jingartatien kaba khraw kumno kane ka sorkar kan lah ban pynïaid ïa ka jylla lada tang ïa kane ka karkhana ba la rim tam ruh kam lah ban pynkhie im biang, pynkut ka kyrwoh na ka seng.
+ There are no comments
Add yours