U shipai u Sepoy Aibok Madur ula iehnoh ia la u khun ba dang shi snem bad ka kurim jong u ka kong Jandaris Lyngdoh Lyngkhoi, na ka jinglen lade na bynta ka ri ban iakhun ia ki nongshun. Mynta ka sngi, la leh burom khadduh ia ka met jong u ha shnong Lyngkhoi da ki shipai, ka shnong Lyngkhoi bad ki paidbah ia une u nongiada ia ka ri. U shipai Aibok Madur u dei na ka shnong Mawbri, Ri Bhoi District, bad ula poi shongkha sha shnong Lyngkhoi ha kaba ki nongshong shnong ki la bat ia ka lama lai rong ka ri India. U la aiti ia la ka jingim namar ka Ri ha Siachen Glacier, jammu kashmir. U Aibok u don ha ka kynhun GOC, Fire and Fury Corps jong ka Indian Army. Une u Samla u la aiti ia la ka jingim ha ka jingiakhun bad ki nongshun ha ka 7 tarik mynta u bnai. Na ka liang ki heh shipai ka ri ki la pynpaw ia ka jingsngewlem ha kiba haiing jong u.
Nalor ka jinglehniam da ka Balang la leh don burom khatduh ruh da ki shipai ka Assam Regiment Centre ia u shipai Aibok Madur ha ka jingsakhi ki paidbah kiba la wan ban sngewlem halor ka jingkhlad noh ka jong u. Ha shwa ban rah ia ka met basah u Shipai Aibok Madur ka la don ka jinglehniam na ka balang bad kumjuh ruh ka jingkren halor ki kam jong u. Kum ka dak ban ai khublei khatduh ia u shipai Aibok Madur, ki khynnah skul bad ki paidbah ka shnong ha lynti ki la ap ha ryngkat bad ki lama India ban ai khublei khatduh ia u shipai Aibok.
Ynda la poi sha lum jingtep ka la don biang ka jinglehniam bad leh burom khatduh da ki shipai ha shwa ban thep ia ka synduk ha thliew bad ynda la dep thep ha thliew ki shipai Assam Regiment ki la siat suloi lai sien sha suin ban ai khublei khatduh.
