Lada jop ka NPP, la thikna ar ngut ki longkmie kin long Myntri sorkar pdeng: Sanbor

U MLA ka BJP u Bah Sanbor Shullai ula ong, ba lada ki ar ngut ki kyrtong longkmie jong ka NPP ki jop ha kane ka MP ilekshon kan long ka jingmyntoi ba khraw ia kane ka jylla namar ba la tikna ba kin ioh long ki Myntri ka sorkar pdeng. Haba kren sha ki lad pathai khubor u bah Sanbor ula pyntikna ba shispah percent kine ki ar ngut ki longkmie kynthup ka kong Ampareen Lyngdoh bad ka Agatha Sangma kin long Myntri sorkar pdeng lada ki jop kum ki MP.

“Lada jop ka Kong Ampareen Lyngdoh bad ka Agatha Sangma ha ka elekshon MP Lok Sabha ka long kaba thikna ba kin ioh long ki Myntri ka Sorkar Pdeng bad kane kan wanrah ka jingmyntoi ia ki paidbah ka jylla namar ba kin iasaid ia ki ishu kiba dang sahteng ka jylla”, ong u bah Sanbor. U la ong ba kine baroh ar ngut na ka bhah jong ki kynthei kin ioh long ki Myntri ka Sorkar Pdeng bad kane ka long ka rekod ha kane ka jylla.

U Bah Sanbor ula ong ba ka NPP bad ka BJP ki dei kiba iatreilang ha ka Sorkar MDA bad kumjuh ruh ha ka Sorkar NDA, namar kane um sngewpher eiei halor ka jingshim rai ki nongialam ka BJP ban ai jingkyrshan ia ka NPP ha ka elekshon MP Lok Sabha ha Shillong bad Tura Constituency. U la ong ba shen yn sa pynlong ia ka jingialang ha kylleng ki District bad ki nongkitkam ka BJP ban sdang ia ka jingialap ilekshon.