U MP ka Shillong Parliamentary konstiwensi u Dr. Ricky Andrew J Syngkon, ula ong ba ka watla ka Voice of the People Party (VPP) ka jop tang 4 ngut ki MLA ha ka elekshon MLA 2023, hynrei ha ka MP elekshon ka la sar naphang ha baroh ki 32 tylli konstitwensi. Ia kane u Dr Ricky ula ong hadien ba la mih ka jingkynnoh na kiwei ki party ba ki MLA ka VPP kim wanrah kam pynroi sha ki konstitwensi jong ki. U Dr Ricky ula ong ba lada kane ka sorkar ka dei kaba don ka jingkitkhlieh, ka dei ban sngewthuh ba u paidbah ula ngiah ula jlep bad ula kwah ia ka jingkylla bad lada kine kiba don ha ka bor kim sngewthuh, u paidbah un sa ai biang ia ka jubab.
“Ki la dei ban sngewthuh ba ha ka MP elekshon, ka VPP ka jop 32 tylli ki konstitwensi na ki 36 tylli kiba hap ha Khasi-Jaintia,”ula ong. Haba iadei bad ki skhim ka sorkar pdeng, ula ong ba ki don shibun ki skhim ka sorkar pdeng kiba kynduh jingeh haba pyntreikam namar ba kim peit bad kim pyrkhat haba wanrah sha kane ka thain kaba iapher shibun na ki jaka ri thor.
“Kane ka thain ka iapher nadong shadong ha ka jinglong jingman ki lum ki wah, bad ka long kaba ma ban shu wanrah najrong sha tbian khlem da tip ia ka khyndew kaba long kumno,” ula bynrap. Ha kajuh ka por, u la ong ba un shim khia ban buddien ia ka jingdawa ban pynrung ia ka ktien Khasi ha ka khyrnit ba phra ka riti synshar ka ri, kaba la sahteng la bun snem haduh mynta.
