U President KSU sengkmie u samla Lambok Marngar hynne ka sngi u la pynpaw ba ka sorkar india ka lah ban kheiñ ba u Pa’iem Wickliffe u dei u nongpyrshah Ri lane uta u Ant-Indian hynrei hapoh jong ka Ri bad ka jaitbynriew Hynniewtrep, ka KSU ka ñiew ia u ba u dei u Hero ne u riewshlur jong ka Ri. “Ka sorkar india ka lah ban khein ba u Pa’iem Wickliffe u dei u nongpyrshah Ri lane uta u Ant-Indian hynrei hapoh jong ka Ri bad ka jaitbynriew Hynniewtrep, hynrei ngi ñiew ia u ba u dei u Hero ne u riewshlur jong ka Ri jong ngi,”ong u President ka KSU Sengkmie ha ka sngi kynmaw burom ia ka lyngkhuh sngi iap ba 36 jong u Pa’iem Wickliffe Syiem uba long u Syiem khynnah ka Hima Nongstoiñ uba la ieng ialeh pyrshah ban iada ia la ka jong ka Hima na ka jingwan synshar jong ka sorkar India.
Ha kane ka sngi la ia don lang ka Khasi Student Union West Khasi Hills District ha ryngkat ka jingiadonlang ki nongialam na ka sengkmie ba kynthup ia u samla Lambok Marngar uba long u President KSU sengkmie, u samla samla Pynshai Ranee, Publicity Secretary KSU sengkmie, u samla Johnfisher Nongsiang, president KSU WKH, u samla Kwilis Suchiang, President KSU East Jaintia Hills, samla Laitphar Syngkrem, President West Jaintia Hills lem bad ki dkhot ka CEC sengkmie, ki nongialam bad dkhot na ki Unit bad ki circle bapher bapher.
Kum ka dak jong ka jingkynmaw burom ia katei ka sngi, na ka liang ka seng ka la pynlong ruh ia ka jingsngap jar ba shiminit bad hadien kata, na ka liang ki nongialam ka seng ki la pynlong ruh ka jingbuh syntiew ha u mot sahkynmaw jong u Pa’iem Wickliffe uba don hapoh ka shnong Sohpian. U President ka KSU u la kren ruh halor ka jingpynsahteng jong ka sorkar iaka mat ILP bad kumjuh halor ka mat jong u Uranium ia kaba u la ong ba dalei lei wat lada hap ban iap ne hap ban jaw snam ruh ka seng kan ym ailad ban tih ia u Uranium. Kiwei pat ki nongkren ha katei ka sngi ki kynthup ia u samla samla Pynshai Ranee, Publicity Secretary KSU sengkmie, U samla Johnfisher Nongsiang, president KSU WKH, u samla Kwilis Suchiang, President KSU East Jaintia Hills, samla Laitphar Syngkrem, President West Jaintia Hills, U samla Franklin Syiemiong General Secretary ka KSU WKH uba la pyniaid ruh ia ka jingialang bad kiwei kiwei.
