Lah Ban Wan Plie Ka President Ïa Ka Meghalaya Games Bad Mawnongrim Ïa Ka Shillong Ropeway

Ka President jong ka Ri, ka Droupadi Murmu ka lah ban wan plie pyrda ïa ka lympung ïalehkai ba heh tam ha ka Jylla kaba la tip kum ka Meghalaya Games ha une u bnai.
La ong ruh ba ha katei ka jingwan jong ka kaba la antad ba kan dei ha ka 15 ne 16tarik Kyllalyngkot, ka President kan buh ruh ïa u mawnongrim na ka bynta ban tei ïa ka Shillong Ropeway Project.
Haba kren bad ki lad pathai khubor ha kane ka sngi Balang, u Myntri ka tnad Tourism ka sorkar jylla, Bah Paul Lyngdoh ba dei ruh u nongai ktien ka sorkar MDA u la ong ba ka sorkar jylla haduh mynta ka dang ap ïa ka jingpyntikna na ka ophis jong ka President ka Ri halor kane.
Lah ban kdew hangne ba ïa ka Meghalaya Games kaban long ha Tura la buh ba kan sdang naduh ka 15tarik Kyllalyngkot haduh ka 20tarik jong u juh u bnai.
Ha kane ka lympung kin don haduh kumba 3,000 ngut ei ei ki nongïalehkai kiban aireng ha ki 22 tylli ki jait jingïalehkai. Na ka liang ka sorkar jylla ruh ka la pynkhreh ban pynlut haduh kumba 23 klur na ka bynta katei ka Games.
“Lada ka President ka Ri ka pyntikna ba kan wan, kaba lehse kan pyntikna ha ki 24kynta ban wan, ngin sa lah ban khot lang ïa ka ban buh ïa u mawnongrim na ka bynta ban tei ïa ka Shillong Ropeway Project ruh,” u la ong.
Dei ha u snem ba la dep, u Myntri Rangbah u la don lang ha ka jingshimti ïa ki jaka puta na ka bynta ban shna ïa katei ka projek ha ka jaka kaba itynnad bha kaba don ha Lum Shyllong.
Ïa kane ka projek la buh ban tei ha ka jaka kaba heh 1.34 hectare kaban kot ha ka jinglut kaba 138 klur tyngka. Kane ka projek kan kynthup naduh ka Lower Terminal Point (LTP), kaba la tyrwa na ka jaka ba don ka sara tynrai dieng jong ka Riat Laban ha ka jaka kaba heh kumba 11146.96sqm.
Hangne yn buh ruh ïa ka Station Building, Concourse, Maintenance Room, Ticket Room cum Office, Store Room, Security Room, Waiting Area, Public Convenience bad jaka pynieng kali.
Katba ïa ka Upper Terminal Point (UTP) la tyrwa ban tei ha ka jaka shnong kaba don kumba 2025 sqm bad hangne yn tei naduh ka Station Building, Concourse, Ticket Room cum Office, Maintenance Room, Waiting Area, Food Court, Public Convenience bad jaka pynieng kali.
Nalorkine kin don ruh sa ki Terminal Point ha kaba yn tei haduh 9 tylli ki tower kiban tei ha ka jaka kaba heh 251.17sqm.
Da ka jingbuh ïa kitei ki ropeway ha Lum Shyllong kan plie lad ïa ki nongwan jngohkai pyrthei kiba wan na kylleng ba kin ïohi ïa ka jingithiang ka nongbah Shillong baroh kawei bad ka jingitynnad ka mei mariang sawdong jong ka.