Ka shnong Ratacherra ba hap hapoh ka Elaka Narpuh, East Jaiñtia Hills District kaba mad ia ka jingkyrduh umbam umdih da kaba hap thied na ki kali ba juh wan buh umdih, ha kane ka kynti ka la long ka jingkmen ba khraw ia ki paidbah nongshong shnong namar ha ka 16 tarik mynta u bnai ka kong R. Kynjing Executive Engineer PHE Electrical Division ka la plie paidbah ia ka skhim sam umbam umdih kaba wan na ka sorkar kmie ba tip kum ka Jal Jeewan Mission (JJM) ne ka skhim ba pynpoi um sha man ki thliew ïing ka shnong Ratacherra. Ia kane ka skhim la tip kum ka Ratacherra Water Supply Scheme (WSS) kaba la pyntrei naduh u bnai December 2022, ha ka jinglut ba T.5, 54,32,300.00.
Ka tynrai ba tan ia kane ka um dei na Karia kaba jngai 16-kilometre na ka shnong Ratacherra, bad haduh kumba 400 tam ki longïing ka shnong Ratacherra ba ioh myntoi na kane ka um.Ha ka jingialang lyngkot ba pyniaid da u waheh shnong Ratacherra u Pynkhlaiñ Dhar, ha Community Hall ka shnong la donlang u P. Syrti J.E RWS, Jowai, u D. Pala Contractor bad u Secretary shnong u Bujli Sumer, nalor ki dkhot ka Village Water & Sanitation Committee (VWSC) ba kynthup u Chairman u Desous Pohshna, Secretary u K.Pohlong bad kiwei. Ka R. Kynjing haba kren ka ong, kane ka sngi dei ruh ka sngi ban aiti noh ia kane ka Um sha ka shnong Ratacherra kumjuh sha ki 400 tam ki longïing.
Ka kyntu ruh ia ki ba kin long kiba don jingkitkhlieh bad sngew trai ia kane ka skhim nalor ban sumar sukher ia ki jaka pyllang um, ki pipe umkor khnang ba kan neh 30 snem katkum ka thong ba la mang hapoh kane ka skhim. Nangta ka la ai khublei ruh ia ki nongshong shnong ba ki la ai jingkyrshan na ka bynta ban pyntrei ia kane ka skhim hapoh shnong bad ka sngewnguh ruh ia ki ophisar ka tnat PHE Jowai kiba la trei shitom ban pyndep ia kane ka skhim na ka bynta ka jingmyntoi u paidbah.
